बहुउद्देश्यीय कभर्डहल निर्माणका लागि भानुमा सरोकारवालाहरुबीच छलफल
भानु : तनहुँको भानु नगरपालिका–९ काउरेटारस्थित खेलमैदानमा निर्माण हुने बहुउद्देश्यीय कभर्डहलका सम्बन्धमा मंगलबार सरोकारवालाहरूबीच छलफल गरिएको छ ।
संघीय सरकारले चालु आर्थिक वर्षका लागि उक्त कभर्डहल निर्माणका लागि ३ करोड रुपैयाँ विनियोजन गरेको छ । राष्ट्रिय खेलकुद परिषदमार्फत कार्यान्वयन हुने यस योजनाका लागि स्थानीय तहले विस्तृत परियोजना प्रतिवेदन (डीपीआर) तयार गरी पेस गर्नुपर्ने व्यवस्था छ । सोही प्रयोजनका लागि सरोकारवालाहरूको बैठक आयोजना गरी आवश्यक छलफल गरिएको नगरपालिकाका शिक्षा अधिकारी ध्रुवराज पौडेलले जानकारी गराए ।
भानु नगरपालिका–९ का वडाध्यक्ष मीनबहादुर गुरुङको अध्यक्षतामा बसेको उक्त बैठकमा नगरपालिकाका शिक्षा तथा खेलकुद शाखाका प्रमुख एवं उपसचिव ध्रुवराज पौडेल, नगर प्रवक्ता तथा वडा नं. ८ का वडाध्यक्ष इश्वरबहादुर घिमिरे, नगरस्तरीय खेलकुद विकास समितिका अध्यक्ष तथा वडा नं. ३ का वडाध्यक्ष तुलकुमार गुरुङ, वडा सदस्य कृष्णराज धमनिया र चिजकुमार श्रेष्ठ, शिक्षक महेन्द्र थापा, रिदय भट्ट, दिपक थापा लगायतले कभर्डहल निर्माणका विषयमा आ–आफ्ना सुझावहरु दिएका थिए ।
बैठकमा शिक्षा अधिकारी पौडेलले केन्द्रको परिपत्र, डीपीआर निर्माण प्रक्रिया र कभर्डहल निर्माणका आवश्यक तयारीका विषयमा सहजीकरण गरेका थिए ।
बैठकले काउरेटार कभर्डहल निर्माणका लागि डीपीआर निर्माण कार्य तत्काल अघि बढाउने निर्णय गरेको छ । साथै, कभर्डहललाई बहुउद्देश्यीय स्वरूपमा निर्माण गरी फुटबलबाहेकका भलिबल, बास्केटबल, ब्याडमिन्टन, फुटसल, तेक्वान्दो, उसु, कराँते, बक्सिङ जस्ता इन्डोर खेलहरू प्रशिक्षण तथा प्रतियोगिता सञ्चालन गर्न सक्ने एरिया र दर्शकका लागि प्याराफिटसहितको आधुनिक संरचना बनाउन सिफारिस गरिएको छ ।
त्यसैगरी कभर्डहलसँगै ट्रयाकसहितको फुटबल मैदान, प्याराफिट, कार्यक्रम सञ्चालनका लागि मञ्च, खानेपानी, शौचालय, कम्पाउन्डिङ र खेलमैदानसम्म पुग्ने पहुँचमार्ग निर्माणका लागि पञ्चवर्षीय योजना स्वीकृतिका लागि प्रस्ताव गर्ने निर्णय पनि बैठकले गरेको छ। यी सबै संरचनाको अनुमानित लागत करिब १५ देखि २० करोड रुपैयाँसम्म हुने बताइएको छ ।
हाल काउरेटार खेलमैदान जिल्ला खेलकुद विकास समितिको नाममा दर्ता छ भने स्थानीय सर्वदलीय समितिबाट खेलमैदान प्रयोजनका लागि भोगाधिकार दिइएको अन्य सार्वजनिक जग्गासहित करिब ४० रोपनी क्षेत्रफल रहेको बताइएको छ ।
यी संरचनाहरू निर्माण सम्पन्न भएपछि भानु नगरपालिकामा व्यवस्थित खेलस्थलको स्थापना हुने र यसले नगर, जिल्ला, प्रदेश तथा राष्ट्रियस्तरका खेलकुद प्रतियोगिता आयोजना गर्न सक्ने वातावरण तयार हुने नगर शिक्षा अधिकारी पौडेलले बताए ।
