अमरसिंह माविका विपन्न विद्यार्थीलाई आमा समूहद्वारा पोशाक वितरण
दमौली : तनहुँको व्यास नगरपालिका–११ धरामपानी स्थित अमरसिंह माध्यमिक विद्यालयमा अध्ययनरत आर्थिक रुपले विपन्न विद्यार्थीलाई स्थानीय गौरवसाली आमा समूहले विद्यालय पोशाक वितरण गरेको छ ।
विद्यालयका ९ जना विद्यार्थीलाई विद्यालय पोशाक स्वरूप सर्ट र पाइन्ट सिलाइ सहयोग गरिएको हो । करिब १५ हजार रुपैयाँ मूल्य बराबरको सहयोग स्वरूप पोशाक गौरवसाली आमा समूहकी अध्यक्ष श्रीमाया रानाले विद्यालयका प्रधानाध्यापक प्रताप गैरेमार्फत विद्यार्थीलाई हस्तान्तरण गरेकी हुन् ।
विद्यार्थीलाई सहयोग हस्तान्तरण गरिएको अवसरमा आयोजित कार्यक्रममा व्यास–११ का वडा सदस्य गोकुल दुराले गौरवसाली आमा समूहको सक्रियता र समाजसेवी भावना प्रति प्रशंसा व्यक्त गर्दै आगामी दिनमा सामाजिक सेवा, शिक्षा र बालबालिकाको हितमा अझ सशक्त योगदान दिन आमा समूहलाई आग्रह गरे ।
कार्यक्रममा दुरा समाजका अध्यक्ष कृष्ण दुरा, विद्यालयका पूर्व प्रधानाध्यापक श्यामकुमार श्रेष्ठ, शिक्षक प्रतिनिधि तिलकबहादुर खड्का लगायतले शुभकामना मन्तव्य दिंदै विद्यालयको शैक्षिक र भौतिक विकासमा सामूहिक सहयोग अपरिहार्य रहेको धारणा राखे ।
विद्यालय व्यवस्थापन समितिका अध्यक्ष गंगा बहादुर घर्तीले विद्यालय वरपरका टोल, आमा समूह, अभिभावक र स्थानीयको सहकार्यबिना विद्यालयको शैक्षिक गुणस्तरमा सुधार सम्भव नरहेको उल्लेख गर्दै आगामी दिनमा अझ मजबुत हातेमालोको अपेक्षा व्यक्त गरे ।
आमा समूहले यसअघि पनि विद्यालयको प्रवेशद्वार निर्माण, विद्यालय पोशाक वितरण, सरसफाइ अभियान, सचेतनामूलक कार्यक्रम लगायत विविध सामाजिक कार्य गर्दै आएको विद्यालयले जनाएको छ ।
स्थानीय स्रोत साधनको सीमितताबीच गौरवसाली आमा समूहले गरेको निरन्तर सहयोगले विद्यालय समुदायलाई हौसला मिलेको बताउँदै प्रधानाध्यापक गैरेले आमा समूहप्रति आभार व्यक्त गरे ।
