आदिकवि भानुभक्त क्याम्पसमा एमबिएस प्रवेश परीक्षा
दमौली : त्रिभुवन विश्वविद्यालय व्यवस्थापन संकाय अन्तर्गत स्नातकोत्तर तहको एमबिएस कार्यक्रममा अध्ययन गर्ने उद्देश्यले आदिकवि भानुभक्त क्याम्पसमा आवेदन दिएका विद्यार्थीहरूको प्रवेश परीक्षा शनिबार लिइएको छ ।
प्रथम सेमेस्टर (२०८२ ब्याच) का लागि आवेदन फारम भरेका ४८ जना विद्यार्थीहरूले शनिबार बिहान क्याम्पस परिसरमा प्रवेश परीक्षा दिएका हुन् ।
आदिकवि भानुभक्त क्याम्पसमा २०६३ सालदेखि एमबिएस कार्यक्रम सञ्चालन हुँदै आएको छ। तनहुँ जिल्लामा हाल आदिकवि भानुभक्त क्याम्पस, दमौलीमा मात्र एमबिएस कार्यक्रमको अध्ययन–अध्यापन भइरहेको छ ।
एमबिएस कार्यक्रमको कक्षा बिहानी सत्रमा सञ्चालन हुँदै आएको छ। क्याम्पसका अनुसार कक्षा बिहान ६ः०० बजेदेखि ९ः०० बजेसम्म सञ्चालन हुने गरेको छ । त्रिभुवन विश्वविद्यालय अन्तर्गत एमबिएस तहको पढाइ सेमेस्टर प्रणालीमा आधारित छ ।
चार सेमेस्टरमा सम्पन्न हुने एमबिएस कार्यक्रमका लागि क्याम्पसले कुल अध्ययन शुल्क १ लाख ४० हजार रुपैयाँ तोकेको छ ।
क्याम्पसले नियमित कक्षामा उपस्थित हुने, जेहेन्दार, सेमेस्टर बोर्ड परीक्षामा उत्कृष्ट नतिजा हासिल गर्ने तथा सामाजिक र आर्थिक रूपमा कमजोर अवस्था भएका विद्यार्थीहरूलाई छात्रवृत्ति तथा पुरस्कार प्रदान गर्दै आइरहेको जनाएको छ । साथै दुर्गम क्षेत्रबाट अध्ययनका लागि आएका छात्रा (महिला) विद्यार्थीहरूका लागि छात्रावासको सुविधा पनि उपलब्ध गराइएको छ ।
त्रिभुवन विश्वविद्यालय व्यवस्थापन संकाय डिनको कार्यालयका अनुसार एमबिएस कार्यक्रमको नियमित कक्षा आगामी माघ महिनाको पहिलो हप्तादेखि सुरु हुने छ ।
