तनहुँ–१ मा जित्नै पर्ने दबाबमा कांग्रेस उम्मेदवार भट्टराई
दमौली : रामचन्द्र पौडेलको राजनीतिक विरासत र केन्द्रीय तहका नेताहरूको उर्वर भूमिका रूपमा चिनिने तनहुँ–१ यतिबेला देशैभरको राजनीतिक चासोको केन्द्र बनेको छ। यही फागुन २१ गते हुने उपनिर्वाचनका लागि नेपाली कांग्रेस, नेकपा (एमाले) र राष्ट्रिय स्वतन्त्र पार्टी बीच रोचक त्रिपक्षीय प्रतिस्पर्धा देखिए पनि स्थानीय स्तरमा भिजेका भट्टराईको चर्चाले नयाँ उचाइ लिएको छ ।
वि.सं. २०५३ सालमा नेपाल विद्यार्थी संघको केन्द्रीय अध्यक्ष भएर देशभरका विद्यार्थीको सफल नेतृत्व गरेका भट्टराई बाल्यकालदेखि नै लोकतन्त्र र जनअधिकारका लागि समर्पित व्यक्तित्वका रूपमा चिनिन्छन्। नेविसंघको दुई कार्यकाल नेतृत्व सम्हाल्दा उनले “सर्टिफिकेट धितो राखेर ऋण लिन पाउने’’ व्यवस्थाका लागि गरेको आन्दोलन र भ्रष्टाचारविरुद्धको अभियानले उनलाई सुशासनका पक्षधर नेताका रूपमा स्थापित गरेको समर्थकहरूको दाबी छ ।
दशकौं लामो राजनीतिक यात्रामा एकपटक पनि लाभको पद नलिई निरन्तर सामाजिक कार्यक्रमा सक्रिय रहेका र निष्ठाको राजनीति गर्नु नै उनको सबैभन्दा ठूलो पुँजी मानिएको छ । विशेषगरी तनहुँमा खानेपानीको समस्या समाधानमा भट्टराईले खेलेको भूमिकालाई उनको मुख्य उपलब्धिका रूपमा चर्चा गरिएको छ ।
भट्टराईको विकास अभियानले ग्रामीण जीवनमा प्रत्यक्ष परिवर्तन ल्याएको स्थानीय बासिन्दाको भनाइ छ। बन्दीपुर–५ भुजेल गाउँकी तारामाया भुजेलले स्वास्थ्य, शिक्षा र सडक पूर्वाधार निर्माणमा उनले सहयोग पु¥याएको स्मरण गर्छिन् ।
राजनीतिक समीकरणका हिसाबले पनि यसपटक भट्टराईको अवस्था बलियो देखिएको कांग्रेस नेताहरूको दाबी छ। अघिल्लो उपनिर्वाचनमा रास्वपालाई सघाएको जोशी समूहले यसपटक छुट्टै उम्मेदवारी दिएपछि विपक्षी मत विभाजित हुने अनुमान गरिएको छ ।
नेपाली कांग्रेस तनहुँ क्षेत्र नम्बर १ का सभापति श्यामकुमार मौरतीका अनुसार कांग्रेसको स्थिर मत र भट्टराईको व्यक्तिगत लोकप्रियता जितको आधार बन्ने अपेक्षा गरिएको छ । समग्रमा, यो निर्वाचन भट्टराईका लागि केवल एक पद प्राप्तिको प्रतिस्पर्धा मात्र नभई तनहुँमा विकास र निष्ठाको राजनीतिलाई स्थापित गर्ने अवसरका रूपमा हेरिएको समर्थकहरु बताउँछन् ।
