जालसाजी मुद्दामा १६५० रुपैयाँ जरिवाना नतिर्दा ६ वर्षपछि अतिमाया पक्राउ
भञ्ज्याङ न्यूज
तनहुँ व्यास नगरपालिका-५ ठुलोटारकी अतिमाया कुमाललाई ६ वर्षअघि जालसाजीको मुद्दा लाग्यो । आफूविरुद्ध मुद्दा परेपछि कुमाल फरार भइन् । अदालतले २०७२ पुस ३० मा उनीविरुद्धको मुद्दामा फैसला गरेको थियो ।
उनलाई १६५० रुपैँया जरिवाना असुल गराउने गरी अदालतले आदेश दिएपनि उनी फरार थिइन् । प्रहरीले उनको खोजतलासी गरिरहेपनि भेटेको थिएन् ।
यस्तै, व्यास-११ का रामबहादुर बलकोटी विरुद्ध उच्च अदालत पाटनमा ठगी मुद्दा पर्यो । अदालतले बलकोटीलाई २ वर्ष २ महिना कारागार पठाउनुका साथै १ लाख ७५ हजार ११९ रुपैयाँ जरिवाना तिराउन आदेश गर्यो । २०६० पुस ८ गते अदालतले उक्त आदेश दिनुअघि नै बलकोटी फरार थिए । प्रहरीले उनको खोजी गर्दा नसकेपछि फाइल थन्क्याएर ‘वान्टेड’ को सूचीमा राखेको थियो ।
आदेश आएको लामो समय भइसकेपछि यी दुवै जना फरार अभियुक्त आ-आफ्नै घर फर्किसकेका थिए । तनहुँ प्रहरीले फरार प्रतिवादी पक्राउ अभियान चलाएपछि फाइल हेर्दा यी दुइको पनि नाम देखियो । प्रहरीले एक पटक फेरी उनीहरुको खोजी थाल्यो ।
यो पटक भने प्रहरी चुकेन । दुवै प्रतिवादीलाई तनहुँ प्रहरीले पक्राउ गर्न सफल भएको छ । ‘फाइल हेर्दा यिनीहरुको नाम देखियो, एक पटक उनीहरुको घर भएतिर खोजौं भनेर जाँदा घरमै भेटिए, लामो समय भएकाले घर फर्किसकेका रहेछन्,’ तनहुँ प्रहरी प्रवक्ता युवराज तिमिल्सिनाले बताए ।
अतिमाया कुमाललाई व्यास-५ ठुलोटार र रामबहादुर बलकोटीलाई व्यास-११ रानीगाउँबाट प्रहरीले पक्राउ गरेको हो । दुबै जनालाई तनहुँ प्रहरीले अदालतमा उपस्थित गराइसकेको छ । अदालतले अतिमायालाई पूर्व आदेशबमोजिम १६५० रुपैयाँ जरिवाना असुल गराएर छाडिदिन आदेश गरेको छ ।
यस्तै रामबहादुर बलकोटीलाई भने कारागार चलान गरिएको तनहुँ प्रहरी प्रवक्ता तिमिल्सिनाले बताए । बलकोटीले अब २ वर्ष २ महिना कैद भुक्तानका साथै १ लाख ७५ हजार बढी जरिवाना तिर्नुपर्नेछ ।
तनहुँ प्रहरीले यस आर्थिक वर्षमा फरार प्रतिवादी पक्राउ अभियान चलाएको छ । यस अभियानमा प्रहरीले ३८३ जना फरार प्रतिवादीलाई पक्राउ गरेको जनाइएको छ ।
