दैनिक दुइ घण्टा दमौलीका बैंक सञ्चालन व्यवस्था मिलाउन व्यासको आग्रह
भञ्ज्याङ न्यूज
तनहुँको व्यास नगरपालिकाले दैनिक विहान १० देखि १२ बजेसम्म बैंक खोल्ने व्यवस्था मिलाइदिन जिल्ला कोभिड-१९ संकट व्यवस्थापन केन्द्र तनहुँलाई आग्रह गरेको छ । नगरप्रमुख बैकुण्ठ न्यौपानेको अध्यक्षतामा बुधबार बसेको व्यास नगर कार्यपालिकाको नियमित बैठकले दैनिक २ घण्टा बैंक खोल्ने अनुमति प्रदान गर्न केन्द्रलाई सिफारिस गरेको हो ।
कोभिड-१९ रोकथाम तथा नियन्त्रणका लागि भईरहेको निषेद्याज्ञाको अबस्थामा वैंकहरुले प्रदान गर्दै आएको नियमित सेवा बन्द रहेकाले कोभिड-१९का संक्रमित घर परिवारले उपचारका लागि वैंकमा रहेको रकम समेत भुक्तानी लिन नपाउदा उपचारमा कठिनाइ भएको भन्ने गुनासो आएकाले २ घण्टा सेवा सञ्चालन गर्न स्थानीय बैंकहरुलाई र जिल्ला कोभिड-१९ संकट व्यवस्थापन केन्द्र तनहुँलाई नगरपालिकाले अनुरोध गरेको नगरपालिकाका शाखा अधिकृत मेघराज आचार्यले जानकारी दिए ।
स्वास्थ्य सुरक्षाका पूर्ण मापदण्ड अपनाएर बढीमा ४ जना जनशक्ति परिचालन गरी बैंकका सेवा सञ्चालन गर्न सिफारिस गरिएको नगरपालिकाले जनाएको छ । साथै निषेद्याज्ञाको अवस्थामा पनि दमौलीका भित्री बाटा तथा सार्वजनिक स्थान र ग्रामीण वडामा मानिसहरुले स्वास्थ्य मापदण्डको उल्लंघन गर्दै चहलपहल एवं भिडभाड गर्ने गरेको भेटिएकाले स्थानीय प्रहरी प्रशासनलाई कडाइका साथ सोको अनुगमन एवं निगरानी गर्न नगरपालिकाले अनुरोध समेत गरेको छ ।
