तनहुँ समाज हङकङद्वारा मृगौला पीडितलाई आर्थिक सहयोग

तनहुँ समाज हङकङले आइतबार दुइ जना मृगौला पीडितलाई आर्थिक सहयोग गरेको छ । समाजले तनहुँको ऋषिङ गाँउपालिका वडा नं ८ पल्ट्याङ्ग घर भएका दुइ जना मृगौला पीडितलाई नगद रु. ४ लाख ५७ हजार आर्थिक सहयोग गरेको हो । दुबै मृगौला फेल भइ उपचारको क्रममा रहेका ४१ वर्षीय लुम बहादुर रिमाली र ३६ वर्षीय खिम बहादुर नेपालीलाई समाजको तर्फाट आर्थिक सहयोग गरिएको हो । मंगलबार खैरेनीटारमा समाजका पूर्व अध्यक्ष भिमराज गुरुङले पीडित द्धयलाई भेटेर नगद रकम हस्तान्तरण गरेका हो ।

पीडित नेपालीलाई २ लाख ७४ हजार २ सय र रिमालीलाई १ लाख ८२ हजार ८ सय रुपैयाँ सहयोग गरिएको समाजका सचिव सुवित गुरुङले जानकारी दिए ।
उनीहरुको नियमित डायलाइसिस लगायतको उपचारमा रकम अभाव भएको खबर स्थानीय टोल बहादुर थापाले हङकङमा रहेका आफ्ना दाई लालबहादुर थापालाई बताएपछि उनको सक्रियतामा हङकङमा रहेका नेपालीहरुबाट संकलित रकम हस्तान्तरण गरिएको हो ।

रकम हस्तान्तरण गर्दै पूर्व अध्यक्ष गुरुङले बिगतदेखि नै दुख पीडामा समाजले मलम लगाउने काम गर्दै आएको बताए । विदेशमा रहेर पनि यहाँका दुखी पीडितहरुको आवश्यकता अनुसार सहयोग गर्न पाउदाँ खुशी लागेको उनको भनाई छ । साथै प्राप्त रकम सही सदुपयोग गर्न समेत उनले पीडितहरुलाई आग्रह गरे ।

हाल गण्डकी मेडिकल कलेज पोखरामा डाइलासिस गर्दै आएका नेपालीले मृगौला प्रत्यारोपण गर्ने तयारीमा रहेकाले उक्त रकमले ठुलो राहत महसुस भएको बताए । त्यस्तै गरी दमौली अस्पतालबाट विगत ५ वर्षदेखि डाइलासिस सेवा लिदै आएका रिमालीले पनि उपचारमा सहयोग पुग्ने भन्दै रकम प्रति आभार व्यक्त गरे ।

तनहुँमा बिगतदेखि नै समाजिक सेवा गर्दै आएको समाजले नेपाली दुख पीडामा परेको खबर आउन साथ हङकङमा विभिन्न सिलसिलामा पुगेका नेपालीहरुसँग समन्वय गरी आफ्नो कमाइबाटै सहयोग रकम पठाउदै आएको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर