एमसिसी नेपालको हितमा छ : वरिष्ठ नेता पौडेल

नेपाली कांग्रेसका वरिष्ठ नेता रामचन्द्र पौडेलले एमसिसी पास राष्ट्रघाती हुन नसक्ने बताएका छन् । शालिक तथा पार्क निर्माण समितिको आयोजना तथा स्व. विक्रम परियारको अर्धकदको शालिक शनिबार अनावरण गर्दै नेता पौडेलले सो कुरा बताएका हुन् ।

एमसिसी सम्झौतामा हस्ताक्षर गरेर कम्युनिष्ट घटक अहिले आएर पन्छिने गरेको उनको आरोप छ । गरिबीपनले हिंसा र आतंकजस्ता गतिविधि हुँदै गएको उल्लेख गर्दै नेता पौडेलले नेपालमा विद्युतीय क्षमता बढाएर आर्थिक पक्षमा सबल भई गरिबी हटाउन महत्वपूर्ण भूमिका खेल्ने बताए ।

लोकतन्त्र र प्रजातन्त्रको रक्षाका लागि स्व परियारले महत्वपूर्ण योगदान पुर्‍याएको चर्चा गर्दै उनले पार्टीले सहिदका रूपमा सम्मान गरेको बताए । पार्टीका केन्द्रीय सदस्य शंकर भण्डारीले कांग्रेसले सहिदको सम्मान गर्दै समृद्ध नेपाल निर्माणका लागि लाग्नुपर्ने बताए ।

कलाकारिता क्षेत्रमा नक्षेत्रका रूपमा उदाएका स्व परियारको बाँकी सपना पूरा गर्न र सहिद पार्क निर्माण गर्न पार्टीले पहलकदमी थाल्नुपर्नेमा जोड दिए । अर्का केन्द्रीय सदस्य गोविन्द भट्टराइले कम्युनिष्ट घटकहरूले एमसिसी माग गरेर पूर्णता दिने अवस्थामा भागेको आरोप लगाए । अमेरिकाले सित्तैमा दिएको अनुदानमा बार्गेनिङ गर्नुका साथै चुनावको मुद्दा बनाएर आर्थिक संकटमा धकेल्ने षड्यन्त्र भएको उनले बताए ।

गण्डकी प्रदेशका आन्तरिक मामिलामन्त्री डोवाटे विश्वकर्माले स्व सहिद परियारको परिवार र नेकांबीच पारिवारिक साथ कायम गर्दै अघि बढ्नुपर्नेमा जोड दिए । व्यास नगरपालिकाको ११ लाख एक हजार २५० रुपैयाँको लागतमा स्व परियारको अर्धकदको शालिक निर्माण गरिएको हो ।

सेयर गर्नुहोस्

प्रतिक्रिया दिनुहोस्

सम्बन्धित खवर