बाढीपहिरोले अवरुद्ध डुम्रे-बेसीसहर सडक अन्तर्गत तनहुँ खण्ड सुचारु
भञ्ज्याङ न्यूज
डुम्रे-बेंसीसहर सडक अन्तर्गत तनहुँको भानु नगरपालिका-८ बलिफाँटमा हृयुमपाइप बाढीले बगाएपछि अवरुद्ध तनहुँ खण्ड सुचारु भएको छ ।
खहरेखोलामा आएको बाढीले तीनवटा हृयुमपाइप बगाउँदा सडक भ्वाङ परेपछि आइतबार बिहानदेखि सवारी आवतजावत बन्द भएको थियो ।
साना सवारीसाधन वैकल्पिक मार्गको प्रयोग गरी सञ्चालनमा आए पनि ठूला सवारी रोकिएका थिए । भत्किएको सडक अस्थायी रुपमा निर्माण गरी साँझा करिब ५ बजेबाट तनहुँ खण्डमा यातायात सुचारु गरिएको इलाका प्रहरी कार्यालय भानुका प्रहरी निरीक्षक रमेश विष्टले जानकारी गराए ।
यस्तै, गए रातिदेखि परेको अविरल वर्षाका कारण बेंसीसहर-चामे सडकखण्डको विभिन्न स्थानमा गरी आधा दर्जन स्थानमा पहिरो जाँदा सडक अवरुद्ध भएको छ । यस खण्डअर्न्तर्गत बेँसीसहर नगरपालिका-६ खरखरे भिर, बेलौती विसना, मर्स्याङ्दी गाउँपालिकाका खुदी, खुदी भुलभुले लगायतका स्थानमा सडक अवरुद्ध भएको डुम्रे-बेँसीसहर-चामे सडक योजना कार्यालय लमजुङका सूचना अधिकारी एवं इञ्जीनियर पुरुषोत्तम अधिकारीले बताए ।
हिमाली जिल्ला मनाङ र पहाडी जिल्ला लमजुङ जोड्ने एकमात्र बेँसीसहर-चामे सडक हो । खरखरेमा मर्स्याङ्दी नदीले तलबाट सडक तान्ने र सडकमाथिबाट ठूला-ठूला ढुङ्गा, माटोसहितको पहिरोले सडक अवरुद्ध भएको छ ।
यस्तै यस सडकखण्डका विभिन्न स्थानमा सडकमाथिबाट पहिरो आउँदा सडक अवरुद्ध भइरहेको स्थानीयवासीको भनाइ छ । यी स्थानको अवरुद्ध सडक खुलाउनका लागि तत्काल सम्भव नभएको इञ्जीनियर अधिकारीको भनाइ छ ।
यस सडकमा बर्सेनि पहिरालेे पटक-पटक सडक अवरुद्ध हुँदा यात्रुले सास्ती भोग्दै आएका छन् । विशेषगरी मनाङका स्थानीयवासी बेँसीसहर हुँदै विभिन्न जिल्ला जानका लागि एकमात्र सडक रहेकाले यो सडक बन्द हुँदा समस्यामा पर्ने गर्दछन् ।
गत वर्षपनि यो सडक अवरुद्ध हुँदा मनाङवासी हेलिकोप्टरको सहायतामा बेँसीसहर आएर काठमाडौँ, पोखरा गएका थिए । हिमाली जिल्ला मनाङलाई सडक सञ्जालमा जोड्ने सरकारको योजनाअनुरुप विसं २०५१ बाट सडक निर्माणको काम अघि बढाउँदै विसं २०६९ मा सम्पन्न भएको थियो ।
यसयता सवारी सञ्चालन हुँदै आए पनि बर्सेनि बर्खायाममा पटक-पटक विभिन्न स्थानमा पहिरो जाँदा सडकसमेत पटक-पटक अवरुद्ध हुँदै आएको छ ।
तल मर्स्याङ्दी नदी र माथि भिरैभिर हुँदै बीचमा साँघुरो सडकमा सवारी सञ्चालन हुँदै आएको छ । इञ्जीनियर अधिकारीका अनुसार यस सडकबाहेक डुम्रे-बेँसीसहर सडक भासिएको छ ।
