बन्दिपुर गाउँपालिकाद्वारा ३ जना छात्रालाई छात्रवृत्ति रकम वितरण
भञ्ज्याङ समाचारदाता/डुम्रे
तनहुँको बन्दिपुर गाउँपालिकाको मित्रता माध्यमिक विद्यालयका तीन जना छात्राहरुलाई छात्रवृत्ति रकम प्रदान गरिएको छ । विद्यालयबाट २०४८ सालमा एसएलसी परीक्षा दिएका विद्यार्थीहरुको समुहबाट संकलित रकमबाट स्थापना गरिएको अक्षकोषबाट छात्राहरुलाई रकम प्रदान गरिएको छ ।
२०७८ सालमा पूर्व विद्यार्थीहरुले एक लाख रुपैयाँ संकलन गरी अक्षयकोष स्थापना गरेका छन् । उक्त अक्षयकोष रकमको व्याज ११ हजार २०० रुपैयाँ र स्थानीय सदस्यहरुबाट संकलित ६ हजार ८०० रुपैयाँ थप गरी तीन जना छात्रालाई जनही छ हजार रुपैयाँका दरले छात्रवृत्ति रकम वितरण गरिएको हो ।
मित्रता माध्यमिक बिद्यालयका प्रधानाध्यापक सरिता पौडेलले छात्राहरु सिर्जना भुजेल, अबिगेल भुजेल र नीरा भुजेललाई छात्रवृत्ति बापतको रकम उपलब्ध गराइएको स्थानीय डिपी अधिकारीले बताए ।
