स्थानीय उत्पादन सहज रुपमा बिक्री वितरण गर्न आँबुखैरेनीमा हाटबजार सञ्चालन

तनहुँको आँवुखैरेनी गाउँपालिकाले हाटबजार सञ्चालनमा ल्याएको छ । स्थानीय कृषकले उत्पादन गरेका उत्पादनलाई सहज रुपमा बिक्री वितरणको व्यवस्था मिलाउनका लागि गाउँपालिकाले हाटबजार सञ्चालनमा ल्याएको हो ।

गाउँपालिकाको वडा नं. ३ स्थित अमिलीबोटमा सञ्चालन गरिएको हाटबजार प्रत्येक शुक्रबार लाग्ने गरी व्यवस्था मिलाइएको गाउँपालिकाका अध्यक्ष शुक्र चुमानले बताए । उनले भने, ‘यो हाटबजारले कृषकले उत्पादन गरेका सामग्री उपभोक्तामाझ पुर्‍याउन सघाउने विश्वास लिइएका छौ ।’

कृषकले उत्पादन गरेका सामग्रीले बजार नपाउने समस्या रहेकाले हाटबजारबाट विक्री गर्दा बजार र मूल्य दुबै पाउने अपेक्षा गरिएको उनले बताए । गाउँपालिकाले ६ वर्ष अघि नै उक्त स्थानमा हाटबजार सञ्चालनका लागि जग्गा भाडामा लिएको थियो । स्थानीय तहमा जनप्रतिनिधि आएसँगै गाउँपालिकाले सोही स्थानमा हाट बजार सञ्चालन गरेको गाउँपालिकाका कृषि शाखा प्रमुख सन्तोष केसीले बताए ।

उक्त हाटबजारको शुक्रबार राष्ट्रियसभा सदस्य सुरेश आलेमगर र गाउँपालिका अध्यक्ष शुक्र चुमानले संयुक्तरूपमा उद्घाटन गरेका छन् । सांसद आलेले हाटबजार स्थापनासँगै स्थानीयस्तरमा उत्पादित वस्तुले सहजरूपमा बजार पाउने विश्वास व्यक्त गरे ।

गाउँपालिका कार्यालयको करिब ४० लाख रुपैयाँ लागतमा वार्षिक दुइ लाख ५० हजार रुपैयाँ भाडा बुझाउने शर्तमा जग्गा लिएर हाटबजार निर्माण गरेको गाउँपालिकाले जनाएको छ । हाट बजारमा कृषि, पशु, बाँसजन्य, मह, घिउ, मकै, भटमास, तरकारी लगायतका स्थानीयस्तरमा उत्पादित वस्तु बिक्रीवितरणका लागि व्यवस्था मिलाइएको छ ।

हाटबजार सञ्चालन तथा व्यवस्थापन कार्यविधि, २०७९ बमोजिम अगुवा कृषक, बुद्विजीवी, वडाका प्रतिनिधि, उद्योग वाणिज्य संघ आँबुखैरेनी बजार एकाइ प्रतिनिधि, व्यवासासी लगायतको कार्यसमिति गठन गरेर काम गर्ने गाउँपालिकाले तयारी गरेको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर