ऋण लिएर वडामा खानेपानी पुर्याउने योजना
भञ्ज्याङ समाचारदाता/तनहुँ
तनहुँको व्यास नगरपालिका-१ स्थित भादगाउँ खानेपानी तथा सरसफाइ उपभोक्ता संस्थाले ऋण लिएर वडावासीमा खानेपानी पुर्याउने योजना साकार हुन लागेको छ ।
नेपाल सरकारको ७० प्रतिशत ऋण र संस्थाको ३० प्रतिशत सहलगानीमा मादीनदी लिफ्ट खानेपानी आयोजनाको निर्माण कार्य अघि बढाइएको थियो ।
आयोजनाको समग्रमा हालसम्म ४५ प्रतिशत कार्य सम्पन्न भइसकेको संस्थाका व्यवस्थापक इश्वर श्रेष्ठले जानकारी दिनुभयो। कूल रु २६ करोडको लागतमा निर्माण सम्पन्न हुने उक्त आयोजनाको ठेक्का पराजुली कन्स्ट्रक्सनले पाएको थियो ।
उक्त संस्थाले सानाठूला गरी चारवटा खानेपानी योजनाबाट वडावासीलाई पानी वितरण गर्दै आए पनि प्रशस्त मात्रामा खानेपानी आपूर्ति गर्न नसकेपछि मादीनदी लिफ्ट सहलगानीमा आयोजना सुरु गरेको हो । भादगाउँ सहलगानी खानेपानी आयोजनाअर्न्तर्गत ५२ किमीमध्ये करिब ४२ किमी दूरीमा शाखा लाइनका खानेपानी पाइप बिच्छयाइसकिएको छ ।
त्यसैगरी मुख्य पाइपलाइनको दुइ दशमलव एक किमी दूरीमा पाइप पर्ुर्ने कार्य सम्पन्न भइसकेको छ । त्यसैगरी, मादीनदी किनारमा सम्पवेलको निर्माण अन्तिम चरणमा पुगेको छ भने अर्को सम्पवेल खन्न सुरु गरिएको छ ।
त्यसैगरी सेडिमेन्टेसन टयाङ्कीको ९० र स्लो टयाङ्कीको ४० प्रतिशत निर्माण सम्पन्न भइसकेको छ । विसं २०८० भदौभित्र सम्पन्न गर्ने गरी उक्त आयोजनाको सम्झौतापश्चात् निर्माण कार्य तीव्र रूपमा अघि बढाइएको हो ।
व्यास नगरपालिका-४ को चुरेखोल्सीस्थित मादीनदी किनारबाट लिफ्ट गरी करिब पाँच किलोमिटर दूरीमा रहेको रिजर्भ टयाङ्कीमा पानी संकलनपश्चात् वडावासीलाई पानी वितरण गरिने छ । मुख्य खानेपानी टयाङ्की रहने अमिली भञ्ज्याङबाट शाखा टयाङ्की रहने भदु्रसम्म मुख्य खानेपानीको पाइप पनि बिच्छयाउन थालिएको संस्थाका अध्यक्ष चिजबहादुर दरैले बताउनुभयो ।
उक्त पम्प हाउसमा दुइवटा मोटरबाट प्रतिसेकेन्ड २६ लिटर पानी तान्न सकिन्छ । वर्षायाम सुरु हुनुअगावै मादीनदी किनारमा सम्पवेल भवन निर्माण गर्ने लक्ष्य राखिएको छ । विसं २०५६ मा उक्त खानेपानी संस्था स्थापना गरी ५२ वटा सार्वजनिक धाराबाट पानी दिन थालेको संस्थाले हालसम्म दुइ हजार छ सय बढी निजी धारा जडान गरी पानी उपलब्ध गराउँदै आएको छ ।
