तनहुँ-१ मा मतगणना सुरु
भञ्ज्याङ न्यूज
तनहुँ निर्वाचन क्षेत्र नम्बर १ मा आइतबार सप्पन्न प्रतिनिधिसभा सदस्य उपनिर्वाचनको मतगणना कार्य सुरु गरिएको छ ।
सर्वदलीय बैठकले आइतबार राती ११:४५ बजेबाट मतगणना गर्ने निर्णय गरेपनि १२:३० बजेबाट मत गणना कार्य सुरु गरिएको हो । मुख्य निर्वाचन अधिकृतको कार्यालयका अनुसार पौने १२ बजेदेखि मतगणना सुरु गर्न दलहरू सहमत भएका हुन् । भानु नगरपालिका-१० बाट मतगणना सुरु गरिएको छ ।
तनहुँ–१ मा आइतबार मतदान सम्पन्न भएलगत्तै ६९ मतदान स्थलका १५२ मतदान केन्द्रबाट मतपेटिका दमौली ल्याइएको थियो । अहिले जिल्ला समन्वय समिति परिसरमा मतगणना कार्य भइरहेको छ ।
मतगणना सुरु गरेपछि दुई दिनभित्र अन्तिम मतपरिणाम सार्वजनिक गर्ने आयोगको तयारी छ । प्रतिनिधिसभा सदस्यका लागि आइतबार भएको उपनिर्वाचनमा तनहुँ-१ मा करिब ५२ प्रतिशत मत खसेको छ । १ लाख २३ हजार ३०५ मतदाता रहेकामा ६३ हजार ७५७ मत खसेको छ ।
बिहान ७ देखि साँझ ५ बजेसम्म भएको मतदान शान्तिपूर्ण रुपमा सम्पन्न भएको मुख्य निर्वाचन अधिकृतको कार्यालयले जनाएको छ । दुई नगरपालिका र तीन गाउँपालिका रहेको यस निर्वाचन क्षेत्रमा निर्वाचन सम्पन्नका लागि एक हजार ३६८ कर्मचारी परिचालन गरिएको थियो ।
