भानु नगरपालिकाका सामुदायिक विद्यालयमा विविध कार्यक्रम गरी राष्ट्रिय बाल दिवस मनाइने

तनहुँको भानु नगरपालिकाका सामुदायिक विद्यालयहरुमा विविध कार्यक्रम गरी राष्ट्रिय बाल दिवस मनाउने कार्यतालिका बनाइएको छ ।

नगरपालिका क्षेत्रका सामुदायिक विद्यालयका प्रधानाध्यापकहरुको आइतबार बसेको बैठकले आगामि भदौ २९ गते राष्ट्रिय बाल दिवसका अवसरमा विद्यालयस्तरीय अतिरिक्त क्रियाकलाप तीनवटा केन्द्रमा तहगत रुपमा सञ्चालन गर्ने निर्णय गरिएको हो ।

नगरपालिकाको शिक्षा शाखाले आयोजना गरेको उक्त बैठकले माध्यमिक तह (कक्षा ९-१२) का लागि हाजिरीजवाफ प्रतियोगिता, आधारभूत तह (कक्षा ६-८) का लागि गायन तथा नृत्य प्रतियोगिता, आधारभूत तह (कक्षा ४-५) का लागि चित्रकला प्रतियोगिता र आधारभूत तह (कक्षा १-३) का लागि म्यूजिकल चियर लगायतका क्रियाकलाप गर्ने निर्णय गरिएको नगर शिक्षा अधिकारी ध्रुवराज पौडेलले जानकारी गराए ।

प्रध्यापकहरुको नियमित बैठकले भानु नगरपालिकामा विद्यालयस्तरीय प्रथम त्रैमासिक परीक्षा शैक्षिक क्यालेण्डर बमोजिम यहि मिति २०८० भदौ ११ गतेबाट १९ गतेसम्म सञ्चालन गर्ने र यसका लागि नगरस्तरीय परीक्षा समितिको संयोजनमा सबै कक्षामा एउटै प्रकारको स्तरयुक्त प्रश्नपत्रबाट परीक्षा सञ्चालन गरिने भएको छ ।

शिक्षक/कर्मचारीको परिचयपत्रका लागि आवश्यक फोटो सहितको विवरण बुझाउन बाँकी विद्यालयले यथाशीघ्र शिक्षा, युवा तथा खेलकुद शाखामा पेश गर्ने, असोज २ गते मनाइने राष्ट्रिय शिक्षा दिवस समारोहमा भानु नगर शिक्षा समितिले गरेको निर्णय अनुसार उत्कृष्ट शिक्षक, विद्यार्थी, विव्यस/शिअसंघ अध्यक्ष, प्रअ, विद्यालय कर्मचारी, सका, कर्मचारी लगायत सरोकारवालाहरूलाई सम्मान गर्नका लागि आवश्यक तयारी गर्ने बैठकले निर्णय गरेको शिक्षा अधिकारी पौडेलले जानकारी गराए ।

यस्तै, बृहत् शैक्षिक सामग्री प्रदर्शनी र अन्तर विद्यालय मैत्रीपुर्ण शिक्षक भलिबल प्रतियोगिता हिउँदे बिदा शुरूहुनु अघि उपयुक्त समयमा सञ्चालन गर्ने निर्णय गरिएको बैठकमा प्रधानायपक बैठकमा चालू आ.व. २०८०/०८१ मा भानु नगरपालिकाको आन्तरिक स्रोतबाट स्वीकृत कार्यक्रम र विनियोजित बजेटका बारेमा जानकारी गराइएको थियो ।

नगर प्रमुख आनन्दराज त्रिपाठीको अध्यक्षतामा आयोजित उक्त बैठकमा नगर शिक्षा अधिकारी पौडेलले बैठकको एजेण्डा र विषयवस्तुको सहजिकरण गरेका थिए । बैठकमा सामाजिक विकास समितिका संयोजक हरिहर उप्रेती, शिक्षा अधिकृत सरस्वती गुरूङ ढकाल, प्रधानाध्यापकहरू र शिक्षकका पेशागत संगठनका अध्यक्षहरूको सहभागिता रहेको थियो ।

सेयर गर्नुहोस्

प्रतिक्रिया दिनुहोस्

सम्बन्धित खवर