विदेश लैजाने बहानामा लाखौ ठगेर भागेको आरोप

तनहुँको शुक्लागण्डकी नगरपालिका-११ का मुकेश सापकोटा नेपाली युवा युवतीलाई वैदेशिक रोजगारीको बहानामा ठगी गरेर फरार भएको आरोप लगाइएको छ ।

हाल दुवइ रहेको बताउने सापकोटाले झापाका निर्मल तामाङ्ग सहित १५ जना बढीबाट भण्डै ५० लाख ठगी गरेको पीडितहरुले बताएका छन् । शुक्लागण्डकी-११ स्थायी ठेगाना भएका सापकोटा परिवार सहित नवलपरासीमा बस्ने भएता पनि उनको परिवार हाल भारतमा रहेको शुक्लागण्डकी-११ वडा कार्यालयले जनाएको छ ।

२७ बर्षीय सापकोटाले विभिन्न देश लैजाने प्रलोभन देखाएर प्रतिव्यक्ति दुइ लाख ५० हजार देखि १२ लाखसम्म असुल गरेको पीडित तामाङ्गले बताएका छन् । उनीविरुद्ध ठगी आरोपमा जाहेरी परेपनि फरार रहदै आएको बताइएको छ ।

शुक्लागण्डकी-११ का वडाध्यक्ष शालिकराम भट्टराइले सापकोटाको ठगी धन्दा बारे वडामा समेत जानकारी भएको बताउँदै उनी नेपालमै हुनसक्ने समेत जानकारी दिए । उनी विरुद्ध पक्राउ पुर्जा जारी भएपनि पीडित र प्रहरीबाट लुक्दै आएको बताइएको छ ।