तनहुँको व्यास-१४ स्थित केशवटार माविमा “एक शिक्षक एक ल्यापटप” कार्यक्रम सञ्चालन

तनहुँको व्यास नगरपालिका-१४ स्थित केशवटार माध्यमिक विद्यालयले ‘एक शिक्षक, एक ल्यापटप’ कार्यक्रम सञ्चालन गरेको छ । विद्यालयले राष्ट्रपति शैक्षिक सुधार कार्यक्रम अन्तर्गत शिक्षकहरुलाई ल्यापटप वितरण गरेको हो । राष्ट्रपति शैक्षिक सुधार कार्यक्रम अन्तर्गत विद्यालयलाई प्रविधिमैत्री बनाउन उद्देश्यले विद्यालयका शिक्षकहरुलाई ल्यापटप वितरण कार्यक्रम सञ्चालन गरिएको वडाअध्यक्ष काजीमान श्रेष्ठले बताए ।

‘विद्यालयले एक शिक्षक, एक ल्यापटपलाई मुल उद्देश्यका साथ १५ जना शिक्षकलाई ल्यापटप प्रदान गरेको छ’, अध्यक्ष श्रेष्ठले भने, ‘संघ सरकारबाट राष्ट्रपति शैक्षिक सुधार कार्यक्रमका लागि प्राप्त ६ लाख ५० हजार तथा विद्यालयको आन्तरिक स्रोतबाट २० प्रतिशत गरी शिक्षकहरुलाई ल्याप्टप उपलब्ध गराइएको छ ।’

विद्यालयका शिक्षकहरूलाई प्रविधिसँग जोड्ने प्रयत्न स्वरुप सञ्चालन गरिएको यो कार्यक्रमले कोरोना कहरका कारण बालबालिकाको सिकाई अवरुद्ध हुँदै आएको र आगामि दिनमा प्रविधिको प्रयोगबाट सिकाई निरन्तरता गर्न मद्दत पुग्ने उनले विश्वास व्यक्त गरे ।

यस्तै, विद्यालयले नमूना विद्यालय बनाउने लक्ष्यका साथ शिक्षकहरुलाई कम्प्युटर सम्बन्धी प्रशिक्षण दिएर प्रविधिमैत्री बनाउँदै लगेको छ । कम्प्युटर सम्बन्धी ज्ञान नभएका शिक्षकलाई तालिमको व्यवस्था गरिएको र यस कार्यक्रम अन्तरगत केही शिक्षकले तालिम लिइएसकेको विद्यालयका प्रधानाध्यापक दुर्गा बहादुर आलेले बताए ।

विद्यालयमा २२ जना शिक्षक कार्यरत रहेकोमा कार्यक्रम अन्तर्गत पहिलो चरणमा कम्प्युटर सम्बन्धी ज्ञान भएका १५ जना शिक्षकलाई ल्यापटप प्रदान गरिएको उनले बताए । उनले भने, ‘विद्यालयमा २५ वटा डेस्कटप कम्प्युटर रहेको र प्रविधिको प्रयोग गरी स्मार्ट बोर्ड, टिभी लगायतका सामग्री प्रयोग मार्फ कक्षामा पठनपाठन गर्दै आएका छौ ।’

विद्यालयले माध्यमिक शिक्षा परीक्षा -एसइइ)मा सहभागी हुने विद्यार्थी र कक्षा ११ तथा १२ का विद्यार्थीलाई अनलाइनबाट पठनपाठन गराउँदै आएको छ । प्रविधिको उचित प्रयोग गरी विद्यार्थीहरुलाई समयानुकूल सीपयुक्त शिक्षा दिन विद्यालय लागि परेको प्रधानाध्यापक आलेले बताए ।

सेयर गर्नुहोस्

प्रतिक्रिया दिनुहोस्

सम्बन्धित खवर