विविध कार्यक्रम गरी तनहुँमा गणतन्त्र दिवस मनाइने
विविध कार्यक्रम गरी तनहुँमा गणतन्त्र दिवस मनाइने भएको छ। गणतन्त्र दिवस जिल्लास्तरीय मूल समारोह समितिको आइतबार बसेको बैठकले जेठ १४, १५ र १६ गते गरी तीन दिनसम्म विविध कार्यक्रम गरी दिवस मनाउने निर्णय गरेको हो ।
गणतन्त्र दिवसलाई भव्य रुपमा मनाउन जिल्लास्थित राजनीतिक दल, कार्यालय, संघसंस्थासँग सहकार्य गरिने समारोह समितिका संयोजक एवं जिल्ला समन्वय समितिका प्रमुख शान्तिरमण वाग्लेले बताए ।
वाग्लेको अध्यक्षतामा आइतबार बसेको बैठकले दिवसका अवसरमा विभिन्न कार्यालय तथा संस्थाको संयोजनमा दिवस मनाउने निर्णय गरेको छ । जसअनुसार जेठ १४ देखि १६ गतेसम्म घरघरमा दीपावली गर्नका लागि जिल्लावासीलाई आग्रह गर्ने निर्णय गरिएको छ ।
यस्तै जेठ १४ गते जिल्लास्थित मठमन्दिर, धार्मिकसंस्था तथा गुम्बाहरुमा प्रार्थना, १४ गते नै उद्योग वाणिज्य संघको संयोजनमा सरसफाइ, नेपाल रेडक्रस सोसाइटीको संयोजनमा रक्तदान कार्यक्रम, व्यास नगरपालिका शिक्षा शाखा र शिक्षा विकास तथा समन्वय इकाइको संयोजनमा मावि स्तरीय वक्तृत्वकला प्रतियोगिता हुनेछ ।
१५ गते प्रभातफेरी र शुभकामना आदानप्रदान, नागरिक स्वास्थ्य जाँच, १६ गते दमौली अस्पतालमा फलफूल वितरण र १६ गते नै महिला जनप्रतिनिधि र महिला कर्मचारीबीच मैत्रीपूर्ण फुटबल गर्ने निर्णय भएको छ ।
बैठकमा व्यास नगरपालिकाका प्रमुख वैकुण्ठ न्यौपाने, प्रमुख जिल्ला अधिकारी जनार्दन गौतम, नेकपा -एमाले) तनहुँका अध्यक्ष हरिराज कंडेल, नेपाली कांग्रेसका उपसभापति देवकुमार श्रेष्ठ, राष्ट्रिय स्वतन्त्र पार्टीका संयोजक विश्व बास्तोला लगायत सरकारी कार्यालय प्रमुख एवं संघसंस्थाका प्रतिनिधिको सहभागिता थियो ।
