बन्दीपुर तीज सप्ताहन्न उत्सवमा म्याग्देको एकता मगर समाज प्रथम
बन्दीपुर : नेपाली नारीहरुको महानचाड हरितालिका तीज पर्वका अवसरमा तनहुँको बन्दीपुर गाउँपालिका–४ मा आयोजित बन्दीपुर तीज सप्ताहन्न उत्सवमा तनहुँको म्याग्दे गाउँपालिकाको एकता मगर समाज प्रथम भएको छ ।
बन्दीपुर केबलकार एण्ड टुरिजम लिमिटेडको आयोजना तथा बन्दीपुर गाउँपालिका र गाउँपालिकाका विभिन्न संघ संस्थाहरुको संयोजनमा गत भदौ १५ गतेदेखि सुरु भएको तीज गीत प्रतियोगितामा एकता मगर समाज प्रथम भएको हो ।
५० प्रतियोगित समुहको सहभागिता रहेको उक्त प्रतियोगितामा प्रथम भएको एकता मगर समाजले नगद रु एक लाख प्राप्त गरेको छ । प्रतियोगितामा बागलुङ कालिका भजनकिर्तन समूह द्वितीय हुँदै समूहले नगद रु ७५ हजार प्राप्त गरेको छ ।
यस्तै, प्रतियोगितामा भानु हरियाली प्राकृतिक कृषक समूह तृतीय भएको छ । उक्त समूहले नगद रु ५० हजार प्राप्त गरेको छ । बन्दीपुर गाउँपालिकास्थित केराबारी आमा समूह २१३.५ अंक प्राप्त गरी सान्त्वना हुँदै नगद रु २५ हजार प्राप्त गर्न सफल भएको छ ।
तीजको अवसरमा एक सातासम्म चलेको उत्सव जिल्लामै सर्वाधिक राशी पुरस्कार भएको प्रतियोगितामा उत्कृष्ट भेषभूषा तर्फ पालुङटार नगर स्तरीय महिला सँजाल र उत्कृष्ट नृत्य तर्फ क्षेत्री समाज दमौली पुरस्कृत भएको छ ।
विजयी समूहलाई बन्दीपुर गाउँपालिकाका अध्यक्ष सुरेन्द्र थापा, बन्दीपुर केबलकार एण्ड टुरिजम लिमिटेडका अध्यक्ष रामचन्द्र शर्माले पुरस्कार वितरण गरेका थिए ।
कार्यक्रममा बन्दीपुर गाउँपालिकाका अध्यक्ष थापाले तीज सप्ताहन्न उत्सवले बन्दीपुरको पर्यटन प्रबद्र्धनमा सहयोग पुग्ने विश्वास व्यक्त गरे ।
उक्त सप्ताहन्न कार्यक्रममा राष्ट्रिय कलाकारहरु प्रजापति पराजुली, पुरुषोत्तम न्यौपाने, हरिदेवी कोइराला, शर्मिला गुरुङ, लक्ष्मी न्यौपाने, सुनिता नेपाली, शान्ता डोटेल, सीता परियार लगायतले सांगितिक प्रस्तुती दिएका थिए ।
यस्तै, सोही अवसरमा धार्मिक शक्तिपीठहरु सिद्धेश्वर महादेव, खड्गदेवी मन्दिर, विन्ध्यवासिनी मन्दिर, तीनधारे ज्योतिर्लिङ्ग, सन्तानेश्वर महादेव, चामुण्डादेवी माई, थानीमाई मन्दिर, पुरानकोट देवी लगायतका देवीको दर्शन गराइएको लिमिटेडका अध्यक्ष शर्माले बताए ।
