दमौली अस्पताललाई एनेस्थेसिया अपरेशन उपकरण सहयोग, अपरेशन गर्ने बाटो खुल्यो
दमौली : तनहुँको दमौली अस्पतालमा बेहोस बनाएर अपरेशन गर्ने सुविधा थपिएको छ । हालसम्म बेहोस बनाइने उपकरण र प्रविधि अभावमा सामान्य अपरेशन हुन नसकेकामा अब त्यसखालका अपरेशन गर्ने बाटो खुलेको हो ।
स्वास्थ्य तथा जनसंख्या मन्त्रालयले अस्पताललाई बेहोस पार्ने उपकरण र प्रविधि सहयोग गरेको छ । हाल मध्यमखालका अपरेशन समेत हुन नसकेकामा एनेस्थेसिया वर्किङ स्टेशन आवश्यक रहेको अस्पतालले बताए पछि स्वास्थ्य तथा जनसंख्या मन्त्री प्रदीप पौडेलले अस्पताललाई उपकरण पठाउने व्यवस्था मिलाएका हुन् ।
मन्त्री भएलगत्तै अस्पताल भ्रमणमा पुगेका बेला पौडेललाई जिल्ला समन्व्य समितिका प्रमुखसमेत रहेका अस्पताल व्यवस्थापन समिति अध्यक्ष शान्तिरमण वाग्ले र अस्पताल प्रमुख परिवर्तन बरालले उपकरण सहयोग मागेका थिए । लगत्तै मन्त्रालयबाट यस्तो सहयोग पठाइएको हो ।
अस्पाल प्रमुख बरालले एनेस्थेसिया वर्किग स्टेशन निर्माणका लागि चाहिने उपकरण, बेहोस बनाउने मेसिन १ थान र मोनिटर १ थान मन्त्रालयबाट प्राप्त भएको जानकारी दिए ।
हाल दुई चिकित्सकसमेत व्यवस्था गरेको अस्पतालले अब मध्यमखालका अपरेशन गर्न सक्ने प्रमुख बरालले जानकारी दिए । ‘उपकरण नभएर रोकिएको हो’, उनले भने, ‘अब बेहोस बनाउनुपर्ने साधारण अपरेशन थाल्न सकिन्छ । पित्तथैली तथा स्त्रीसम्बन्धी रोग र हड्डीको अपरेशन सेवा पनि प्रदान गर्ने गरी अगाडि बढेका छौ ।’
