भानुमा दुग्ध उत्पादक कृषकलाई उत्पादनमा आधारित अनुदान प्रदान
भानु । तनहुँको भानु नगरपालिकाले कृषकलाई उत्पादनमा आधारित अनुदान उपलब्ध गराउने भएको छ । आर्थिक वर्ष २०८०/०८१ को विनियोजित बजेट मार्फत दुधमा आत्मनिर्भर बनाउन दुग्ध प्रवद्र्धन कार्यक्रम अन्तर्गत नगरपालिकाले कृषकलाई दुधमा प्रतिलिटर ३ रुपैया अनुदान दिएको छ ।
नगरपालिकाले प्रगती दुग्ध उत्पादक सहकारी संस्था भानु–८ बगाले र कालिका दुग्ध उत्पादक सहकारी भानु–९ अर्चलधारा विच सम्झौता गरी अनुदान उपलब्ध गराएको प्रमुख प्रशासकीय अधिकृत दिवाकर पौडेलले बताए ।
स्थानीय प्रगती दुग्ध उत्पादक सहकारी संस्था र कालिका दुग्ध उत्पादक सहकारीले उपलब्ध गराएको विवरणको आधारमा नगरपालिकाले प्रतिलिटर दुधमा ३ रुपैयाँ दरले अनुदान रकम उपलब्ध गराइएको उनले बताए।
अनुदान कार्यक्रम अन्तर्गत दुई सहकारीमा आवद्ध रहेर दूध बिक्री गर्ने किसानहरुका लागि ४ लाख २० हजार रुपैयाँ उपलब्ध गराईएको पशु सेवा प्राबिधिक अमित ढुंगानाले बताए । सहकारीले नगरपालिकासंगको सम्झौता अनुसार सहकारी संस्थाले हरेका एक महिनामा दुइ पटक संकलित दुधको विवरण भानु नगरपालिकालाई उपलब्ध गराउनुपर्ने व्यवस्था गरिएको छ। दुधको मूल्य नेपाल सरकारले तोकेको फ्याट र एसएनएफ को आधारमा निर्धारण गर्ने गरिएको छ ।
नगर प्रमुख आनन्दराज त्रिपाठीले भानुलाई दुधमा आत्मानिर्भर बनाउन र उत्पादनका आधारमा कृषकलाई अनुदान दिँदा कृषक पनि उत्साहित हुने र युवा पुस्तामा कृषि फर्महरु सञ्चालन गर्न प्रोत्साहन मिल्ने विश्वास व्यक्त गरे । उनले भानुबाट आगामी आर्थिक वर्षमा गाई पालन गर्ने कृषकलाई अधिकतम ५० हजार रुपैयाँसम्म सहयोग अनुदान दिने नीति ल्याइएको बताए ।
स्वदेशमै बस्ने युवा र विदेशबाट फर्केका युवालाई व्यवसायीक कृषि र पशुपालन व्यवसायमा आकर्षित गर्न नगरपालिकाले उत्पादित उपजको बजार व्यवस्थापनको ग्यारेन्टीसंगै औषधि, वीमा र सडक व्यवस्थापनमा नगरपालिका प्रतिबद्ध रहेको नगरप्रमुख त्रिपाठीले बताए ।
