हत्या अभियोगमा फरार रहेका जोगी पक्राउ
दमौली : तनहुँको देवघाट गाउँपालिाक–५ बद्रीमुक्ति बस्ने ३२ वर्षीय प्रकाश पौडेलको हत्या अभियोगमा फरार रहेका एक जनालाई शनिबार बिहान प्रहरीले पक्राउ गरेको छ ।
महोत्तरी बर्दिबास नगरपालिका–१ बस्ने ४६ वर्षीय जोगी भन्ने लोकबहादुर महतलाई प्रहरीले पक्राउ गरेको हो । उक्त वारदात पश्चात् फरार रहेका महतलाई चितवनको भरतपुर महानगरपालिका–१ स्थित रोटरी क्लवले सञ्चालन गरेको वृद्धाश्रममा लुकेर बसेको अवस्थामा पक्राउ गरिएको जिल्ला प्रहरी कार्यालय तनहुँका प्रहरी निरीक्षक आशिष विकले जानकारी दिए ।
यसअघि उक्त घटनामा संलग्न रहेको अभियोगमा पाल्पाको तानसेन नगरपालिका–८ नयाँपाटी बस्ने २८ वर्षीय बुद्धि सारु मगर र मकवानपुरको हेटौडा उपमहानगरपालिका–३ हटिया बस्ने ४२ वर्षीय राम लामा पक्राउ परिसकेका छन् ।
बिहीबार बिहान पौडेल घरदेखि अन्दाजी तीन सय मिटरको दूरीमा रहेको कच्ची सडकमा लडिरहेको अवस्थामा स्थानीयवासीले भेटेका थिए । उनलाई तत्काल उपचारका लागि भरतपुर अस्पताल चितवन लगिएकामा उनको उपचारका क्रममा मृत्यु भएको प्रहरीले जनाएको छ ।
घटनापश्चात् इलाका प्रहरी कार्यालय आँबुखैरेनीका प्रहरी निरीक्षक टेकप्रसाद सुवेदीको नेतृत्वमा पुगेको टोलीले सुक्ष्म रुपमा अनुसन्धान गर्दा निजहरु मादक पदार्थ सेवन गरी झैझगडा गरेको खुल्न आएको छ । पक्राउ परेका तीन जनाले पौडेललाई कुटपिट गरेको प्रहरीले जनाएको छ ।
