आँबुखैरेनीमा कृषि बाली पात्रो सार्वजनिक
आँवुखैरेनी : तनहुँको आँबुखैरेनी गाउँपालिकाले स्थानीयस्तरमा उत्पादन हुँदै आएका १२ प्रमुख बालीको वैज्ञानिक उत्पादन तालिका तथा जैविक प्रविधिको जानकारी समेटिएको ‘कृषि बाली पात्रो’ सार्वजनिक गरेको छ ।
गाउँपालिका कृषि शाखाको पहलमा तयार गरिएको पात्रोको उद्देश्य किसानलाई सही समयमै बाली रोपाइँ, स्याहार, मल व्यवस्थापन, रोग नियन्त्रण तथा कटाइ–थन्काइ सम्बन्धी समुचित जानकारी प्रदान गर्नु रहेको छ ।
कृषि शाखाप्रमुख सन्तोष केसीले पात्रोले किसानलाई मौसमअनुकूल खेती प्रणाली अपनाउन सहयोग पु¥याउनुका साथै जैविकखेती प्रविधिको प्रचारप्रसार गर्दै दिगो कृषि प्रणालीमा अभिप्रेरित गर्ने बताए ।
पात्रोमा अन्नबाली, तरकारीबाली, दलहन, तेलहन, फलफूल लगायत विभिन्न १२ बालीका विशेषता, बीउ छनोटदेखि भण्डारणसम्मका चरण र जैविक मलको प्रयोग विधि उल्लेख गरिएको छ ।
