फेसबुकबाट भएको आम्दानी विद्यालयमा सहयोग
भानु : सामाजिक सञ्जाल फेसबुकबाट भएको आम्दानी एक युवकले विद्यालयलाई सहयोग गरेका छन् । तनहुँको भानु नगरपालिका–२ नारेश्वरटार निवासी मनोजकुमार श्रेष्ठले फेसबुकबाट भएको आम्दानी विद्यालयलाई सहयोग गरेका हुन् ।
श्रेष्ठले भानु नगरपालिका–५, बारीफाँटस्थित नारायणी आधारभूत विद्यालयमा अध्ययनरत गरीब तथा जेहेनदार विद्यार्थी र शैक्षिक सुधारका लागि आम्दानी भएको रकम सहयोग गरेका हुन् ।
श्रेष्ठले फेसबुकबाट आम्दानी भएको पाँच हजार पाँच सय ५५ रुपैयाँ विद्यालयलाई सहयोग गरेका छन् । विद्यालय परिवारले श्रेष्ठको सहयोगप्रति आभार व्यक्त गर्दै यसले विद्यार्थीलाई अझै उत्साहपूर्वक अध्ययनमा प्रेरित गर्ने विश्वास लिएको छ ।
श्रेष्ठले सामाजिक सञ्जाल फेसबुकमार्फत कमाएको रकमलाई शिक्षा क्षेत्रमा खर्चिनु नै साँचो लगानी हुने विश्वास व्यक्त गर्दै निरन्तर यसप्रकारका सहयोगी कार्यमा संलग्न रहने प्रतिबद्धता जनाए । उनले भने, ‘फेसबुकबाट आम्दानी भएको रकम प्रत्येक महिना भानु क्षेत्रमा विपन्न र सहयोग आवश्यकता भएकालाई सहयोग गर्नेछु ।’
