बिदामा सरकारी साधन नचलाउन व्यास नगरपालिकाको निर्देशन
दमौली : तनहुँको व्यास नगरपालिकाले दसैं बिदामा सरकारी साधन नचलाउन जनप्रतिनिधि एवं कर्मचारीलाई निर्देशन दिएको छ। जिल्ला प्रशासन कार्यालय तनहुँको सूचना अनुसार चाडपर्वका अवसरमा स्थानीय तहमा निर्वाचित जनप्रतिनिधि र कार्यरत कर्मचारीहरुले अत्यावश्यक सेवाका सवारी साधन बाहेकका सरकारी सवारी साधन नचलाउन नगरपालिकाले निर्देशन दिएको छ ।
जनप्रतिनिधि र कर्मचारीहरुले दसैं बिदा हुनुपूर्व आइतबारसम्म आफूले प्रयोग गरिरहेको सरकारी सवारी साधन कार्यालय परिसरमा राखी जान भन्दै प्रमुख प्रशासकीय अधिकृत सुकदेव लम्सालले सूचना जारी गरेका छन् ।
जारी सूचनामा सरकारी सवारी साधन बिदाको दिन चलाइ दुरुपयोग भएको खण्डमा सम्बन्धित सवारी साधन प्रयोग गर्ने पदाधिकारी र कर्मचारी जिम्मेवार हुने उल्लेख गरिएको छ ।
