भानुमा पशु स्वास्थ्य घुम्ती शिविर
भानु : तनहुँको भानु नगरपालिका पशुपंक्षी तथा मत्स्य विकास शाखाले पशु स्वास्थ्य सम्बन्धी दुईदिने निःशुल्क घुम्ती शिविर सम्पन्न गरेको छ । गत शुक्रबार र शनिबार सञ्चालन गरिएको उक्त शिविर भानु नगरपालिका–६ सिम्पानी तथा वडा नं. ४ रानागाउँ र खातिथोकमा सम्पन्न गरिएको हो ।
शिविरमा डा. सन्तोष देवकोटा तथा भानु नगरपालिका पशु विकास शाखामा कार्यरत प्राविधिकहरूको सहजीकरण गरेका थिए । शिविरबाट करिब २५० जना कृषक लाभान्वित भएको बताइएको छ ।
कार्यक्रममार्फत पशुहरूको निःशुल्क औषधी वितरण, सामान्य उपचार, बन्ध्याकरण तथा खोप सेवा प्रदान गरिएको आयोजकले जनाएको छ । स्थानीय कृषकहरूले यस्तो प्रकारका घुम्ती शिविरले पशुपालन व्यवसायलाई सहज र प्रभावकारी बनाउन सहयोग पुगेको बताएका छन् ।
