देवघाट गाउँपालिकामा आधारभुत अस्पताल निर्माणका लागि सम्झौता

तनहुँको देवघाट गाउँपालिकामा गाउँपालिका स्तरीय आधारभुत अस्पताल निर्माण कार्य अगाडि बढाइने भएको छ । गाउँपालिकाले अस्पतालको भवन निर्माणका लागि बुधबार निर्माण कम्पनीसंग सम्झौता गरे गरेको छ । गाउँपालिका र भवन निर्माण गर्ने कम्पनी रोशन शिवशक्ति जेभि हेटौडा बिच भवन निर्माण सम्बन्धी सम्झौता गरिएको छ । सम्झौता पत्र आदानप्रदान गर्दै अस्पताल भवन निर्माण कार्यलाई सहयोग र सहज गर्न देवघाट गाउँपालिका तयार रहेको बताउदै गुणस्तरीय रुपमा समयमै भवनको निर्माण सम्पन्न गर्न गाउँपालिका अध्यक्ष दुर्ग बहादुर थापाले आग्रह गरेका छन् ।

भवनको गत मंसिर १५ गते तनहुँ क्षेत्र नम्बर १ संघीय सांसद कृष्णकुमार श्रेष्ठ किसानले शिलान्यास गरेका थिए । सो भवनको सूचना प्रकाश भने गत साल पुस २९ गते भएको र सुचना अनुसार १४ वटा बोलपत्र कार्यालयमा पेस भएको गाउँपालिकाले जनाएको छ ।

जसमा प्रविधिक र आर्थिक प्रस्तावको मुल्यांकनमा रोशन-शिवशक्ति जे.वि. हेटौंडा पहिलो नम्बरमा परेको थियो । बोलपत्रको मुल्यांकन प्रक्रिया पुरा गरी बुधबार सम्झौता गरिएको अध्यक्ष थापाले बताए । दस शैय्याको आधारभूत अस्पताल भवन निर्माण कार्य २०८० साल बैशाख २१ गते भित्र सम्पन्न गर्नुपर्ने गरी सम्झौता गरिएको छ ।

भवन निर्माणका लागि कार्यालयको कुल लागत मुल्य वृद्धि संयोजना र भैपरि खर्च सहित १२ करोड ८३ लाख ४१ हजार ८६६ रुपैयाँ ५४ पैसा रहेको छ । रोशन-शिवशक्ति जे.वि. हेटौंडाले भ्याट सहित ७ करोड ७८ लाख ५२ हजार ७१८ रुपैयाँ ५७ पैसामा सम्पन्न गर्नुपर्ने छ । ८ रोपनी क्षेत्रफल जमिनको करिब दुइ रोपनी क्षेत्रफल भित्र अस्पताल दुइ तले भवनको भुइ तलमा १६ र माथिल्लो तलामा १६ गरी ३२ कोठाको लिफ्ट र र्‍याम्प सहितको आधुनिक भवन हुने देवघाट गाउँपालिकाका प्रमुख इन्जिनियर तिर्थराज ढुंगानाले जानकारी दिए ।

कार्यक्रममा देवघाट गाउँपालिका प्रमुख प्रशासकीय अधिकृत नरहरि सापकोटा, देवघाट-४ नम्बर वडा अध्यक्ष पदम बहादुर गुरुङ, देवघाट गाउँपालिकाका प्रवक्ता तथा ५ नम्बर वडा अध्यक्ष याल बहादुर गुरुङ, गाउँपालिका प्रशासन प्रमुख गोविन्द पौडेल, लेखा प्रमुख उमनाथ ढकाल, गाउँपालिका स्वास्थ्य प्रमुख प्रदीप बुढाथोकी र शिवशक्ति जेवि हेटौंडा मकवानपुरका प्रतिनिधि सुरेन्द्र पाठक लगाएतले अस्पताल भवन समयमै निर्माण सम्पन्न सबैले आ-आफ्नो क्षेत्रबाट जिम्मेवार भूमिका निर्वाह गर्ने प्रतिवद्धता जनाएका थिए ।

सेयर गर्नुहोस्

प्रतिक्रिया दिनुहोस्

सम्बन्धित खवर