भिडियो एक्स-रेको प्रयोग गरी पशुको उपचार
भञ्ज्याङ समाचारदाता/दमौली
भेटेरिनरी अस्पताल तथा पशु सेवा विज्ञ केन्द्र तनहुँले भिडियो एक्स-रे मेशिनको प्रयोग गरी साना पशुहरुको उपचार सेवा प्रवाह गरेको छ । कार्यालयले यो मेशिनको प्रयोग गरी साना पशुहरुमा देखिने रोगहरु निदानको लागि सहज भएको जनाएको छ ।
विशेष गरी कुकुर, बाख्रा जस्ता साना पशुमा देखिने पत्थरी जस्ता रोगहरु पहिचान गरी निदान गर्न भिडियो एक्स-रे मेशिनको प्रयोग गर्ने गरेको कार्यालयका प्रमुख डा. बालकुमार श्रेष्ठले बताए । उनले भने, ‘गाई भैंसी जस्ता ठुला पशुहरुमा बाझोपन निवरण तथा अन्य रोगको पहिचानमा यो मेशिन उपयोगी भएको छ । यो प्रविधिलाई रेक्टर प्रोप भन्छन यसलाई गुद्वार भित्र राखेर पाठेघरमा भएका बिकृतिका उपचारमा सहज भएको छ ।’
यस्तै, कार्यालयले बहुवर्षीय योजना अन्तरगत मोडल भेटेरिनरी अस्पताल निर्माण प्रक्रिया अगाडि बढाएको छ । अस्पताल निर्माणका लागि ठेक्का लागि सकेको र १८ महिना भित्र निर्माण सम्पन्न गर्ने लक्ष्य लिएको प्रमुख डा. श्रेष्ठले बताए । अस्पताल निर्माण पश्चात तनहुँ जिल्ला सहित आसपासका छिमेकी जिल्लाका पशुपालक कृषकहरुलाई आफुले पालेका पशुमा देखिने स्वास्थ्य सम्बन्धी समस्या निवारण, रोग नियन्त्रण गर्न सहयोग पुग्ने बताइएको छ । करिब १० करोड रुपैयाँको लागतमा अस्पताल निर्माण गरिने भएको छ ।
