आँबुखैरेनीमा तमु भाषा तथा खेमालिपि प्रशिक्षण
आँवुखैरेनी : तनहुँको आँबुखैरेनी गाउँपालिका–३, पानीघट्टास्थित माई छिम्केश्वरी तमु सुधार समाजले तमु (गुरुङ) भाषा तथा खेमालिपि संरक्षण तथा प्रवर्द्धन गर्ने उद्देश्यले प्रशिक्षण कार्यक्रम सुरु गरेको छ ।
समाजले हरेक शनिबार र आइतबार सञ्चालन गर्ने उक्त प्रशिक्षणमा २५ जना तमु -गुरुङ) प्रशिक्षार्थी सहभागी छन् ।
तमुस्यो ह्युल छोंज धीं महिला गुरुङ राष्ट्रिय परिषद्, आँबुखैरेनीकी अध्यक्ष डोलमाया तमुको अध्यक्षता तथा तमु ह्युल छोंज धीं आँबुखैरेनीका अध्यक्ष पूर्ण तमुले एक कार्यक्रमका बीच तालिमको शुभारम्भ गरेका थिए ।
कार्यक्रममा तमुस्यो ह्युल छोंज धीं महिला गुरुङ राष्ट्रिय परिषद् तनहुँकी सदस्य तथा वडा नं. ४ की वडा सदस्य मिनसोभा गुरुङ र तमु ह्युल छोंज धीं गुरुङ राष्ट्रिय परिषद् आँबुखैरेनीका सचिव राजेन्द्र गुरुङ, समाजकी पूर्व उपाध्यक्ष आइतमाया गुरुङ, टकमाया गुरुङ लगायतले आफ्नो भाषा, संस्कार, संस्कृतिको महत्वका विषयमा चर्चा गरेका थिए ।
अनिता तमु, रितु तमु र लक्ष्मी तमुले प्रशिक्षाथीर्हलाई प्रशिक्षण दिएको डोलमाया तमुले जानकारी गराइन् । माई छिम्केश्वरी तमु सुधार समाजका अध्यक्ष पृथबहादुर गुरुङका अनुसार प्रशिक्षण सञ्चालन हुने दिनमा आवश्यक स्टेशनरी तथा खाजा खर्च समाजका आजीवन सदस्यहरूले पालैपालो व्यवस्थापन गर्ने भएका छन् ।
