एकल महिलालाई म्याग्देले रातो टिका र पछ्यौरा उपहारदिने
भञ्ज्याङ समाचारदाता (म्याग्दे)
तनहुँको म्याग्दे गाउँपालिकाले अन्तर्राष्ट्रिय नारी दिवसका अवसरमा गाउँपालिकाका एकल महिलाहरुलाई रातो टिका र पछ्यौरा दिएर सम्मान गर्ने भएको छ । मारच ८ अर्थात फागुन २४ गते मनाइने दिवस तयारी बैठकले उक्त निर्णय गरेको हो । यस्तै, दिवसका अवसरमा गाउँपालिकाले यही फागुन २१, २२ र २३ गते माध्यमिक तह स्तरीय छात्रा फुटबल प्रतियोगिता गर्ने भएको छ भने फागुन २४ गते एकल महिलालाई सम्मान गर्ने निर्णय भएको गाउँपालिका अध्यक्ष मायादेवी रानाले जानकारी गराइन् ।
दिवस तयारी बैठकमा प्रमुख प्रशासकिय अधिकृत नारायण प्रसाद अधिकारीले अन्यत्र भन्दा फरक र प्रभावकारी कार्यक्रम गर्ने गरी दिवस मनाउने तयारी गरिएको बताए । त्यस्तै, गाउँपालिका स्तरीय मावि छात्रा फुटबल प्रतियोगितामा प्रथमलाई १० हजार, द्धितीयलाई ८ हजार र तृतीयलाई ५ हजार रुपैयाँ नगद, ट्रफी, मेडलद्वारा पुरस्कृत गर्ने गाउँपालिकाले जनाएको छ ।
