तनहुँमा निर्माणाधीन अवस्थामा रहेका पाँचवटा सडकको म्याद थप

पूर्वाधार विकास कार्यालय एकाइ कार्यालय तनहुँमार्फत निर्माणाधीन अवस्थामा रहेका पाँचवटा सडकको म्याद थप गरिएको छ । कोरोना कारण निर्माणकार्य अवरुद्ध भएका सडकको आगामी आर्थिक वर्षभित्र सम्पन्न गर्ने गरी विभिन्न चरणमा म्याद थप गरिएको हो ।

जिल्लाको दुलेगौडा-हर्कपुर सडक आगामी असारसम्म, भानुमार्ग आगामी फागुनसम्म, मानपुर-डेढगाउँ मोटरमार्गको फागुनसम्म र आँबुखैरेनी-छिम्केश्वरी आगामी असोजसम्म म्याद थपका लागि मन्त्रालयमा पठाइएको छ । त्यसैगरी दासढुङ्गा-देउपुर सडक आगामी असारसम्म म्याद थपका लागि प्रक्रियामा राखिएको कार्यालयका सिनियर डिभिजन इञ्जीनियर दिनेशकुमार घिमिरेले जानकारी दिनुभयो ।

जिल्लाको देवघाटबाट घिरिङ गाउँपालिका हुँदै केलादीघाट कालीगण्डकी नदीको तीरैतीर स्याङ्जा, पाल्पा जोड्ने शालिकराम करिडरअन्तर्गत ६८ किलोमिटर सडकमध्ये दासढुङ्गा-देउपुरसम्म छ किमी कालोपत्र भएको छ भने २५ किमी ग्राबेल गरिएको र बाँकी ३७ किमी ग्राबेल गर्न बाँकी रहेको उहाँले बताउनुभयो ।

त्यसैगरी १३ पुलमध्ये आठवटाको भर्खरै मात्रै बोलपत्र भएको छ भने पाँचवटा पुलको यसै आवको असार मसान्तभित्र सम्पन्न गर्ने लक्ष्य राखिएको छ । शालिकराम करिडर अन्तर्गत ऋषिङ गाउँपालिका-४ र ५ जोड्ने ज्वालाखोला पुल, ऋषिङ गाउँपालिका-५ लुक्दीखोला पुल, घिरिङ गाउँपालिका-४ को तिरमदीखोला पुल, घिरिङ गाउँपालिका-१ पुट्टार द्रौपद पुल, भिमाद नगरपालिका र ऋषिङ गाउँपालिका जोड्ने फेदीखोलामा निर्माणाधीन अवस्थामा रहेको पुल यसै आवमा सम्पन्न गर्ने लक्ष्य छ ।

बोलपत्र भएका आठवटा पुलको तीन वर्षको ठेक्का म्याद रहेकाले यसै वर्षसम्झौता गरी निर्माणको चरणमा रहेको सो कार्यालयका साइड इन्चार्ज होमनाथ गौतमले जानकारी दिनुभयो ।

सेयर गर्नुहोस्

प्रतिक्रिया दिनुहोस्

सम्बन्धित खवर