तनहुँको व्यास नगरपालिकाका जनप्रतिनिधिलाई विदाई

तनहुँको व्यास नगरपालिकाले पाँच वर्षो कार्यकाल पूरा गरेका जनप्रतिनिधिलाई एक कार्यक्रमको आयोजना गरी बिहीबार विदाई गरेको छ । ‘पाँच वर्षे कार्यकालको विदाई तथा फेरी भेटौला’ कार्यक्रमको आयोजना गरी नगरपालिकाले जनप्रतिनिधिहरुलाई विदाई गरेको हो ।

सो अवसरमा व्यास नगरपालिकाका प्रमुख प्रशासकीय अधिकृत डिल्लीराम सिग्देलले निवर्तमान नगरप्रमुख बैकुण्ठ न्यौपाने, उपप्रमुख मिरा जोशी, वडाध्यक्ष, सदस्य लगायत कार्यपालिका सदस्यहरुलाई खादा ओढाइ विदाइ गरेका हुन् ।

कार्यक्रममा मन्तव्य राख्दै निवर्तमान नगरप्रमुख न्यौपानेले नगरक्षेत्रमा गरिएका बिकासका कामहरु धेरै सन्तोषजनक भएको उल्लेख गर्दै काम गरे अनुसार समिक्षा गर्न र अझै पनि जनताका आवश्यकता जरुरी रहेको बताए ।

त्यस्तै निवर्तमान उपप्रमुख जोशीले नगरपालिकाले छनोट गरेका योजनालाई गम्भिर रुपमा अध्ययन गरेर काम गर्न सफल भएको बताए । कार्यक्रममा कार्यवाहक नगरप्रमुख लेखबहादुर रानाले सिमित स्रोत र साधनका बाबजुद पनि नगरपालिकाले धेरै काम गर्न सफल भएकोबताए ।

प्रमुख प्रशासकीय अधिकृत सिग्देलको सभापतित्वमा सम्पन्न कार्यक्रममा व्यास-४ का वडाध्यक्ष विश्व न्यौपाने, कार्यपालिका सदस्य चन्द्रमाया परियार, नगरपालिकाका उपनिर्देशक राजेन्द्र कार्की लगायतले आ-आफ्नो धारणा राखेका थिए ।

सेयर गर्नुहोस्

प्रतिक्रिया दिनुहोस्

सम्बन्धित खवर