बन्दीपुरको पर्यटन लक्षित नीति : “सभ्य समाजको गाउँ, बन्दीपुर घुम्न जाउँ”

पर्यटकीय नगरी बन्दीपुरमा पर्यटकलाई आकर्षित गर्न तथा पर्यटन लक्षित गतिविधि सञ्चालनका लागि गाउँपालिकाले ‘सभ्य समाजको गाउँ, बन्दीपुर घुम्न जाउँ’ अभियान चलाउने भएको छ । आर्थिक वर्ष २०८०/०८१ को नीति तथा कार्यक्रममा गाउँपालिकाले पर्यटनलाई विशेष प्राथमिकतामा राखेर कार्यक्रम अगाडि बढाउने भएको छ ।

पहाडकी रानी नामले परिचित बन्दीपुरको पर्यटनलाई विश्वसनीय, भरपर्दो र आकर्ष बनाउन विभिन्न प्रवर्द्धनका कार्यहरू प्राथमिकताका साथ अगाडि बढाउने नीति तथा कार्यक्रम ल्याइएको गाउँपालिकाका अध्यक्ष सुरेन्द्र थापाले बताए ।

‘बन्दीपुर आन्तरिक तथा बाहृय पर्यटकको गन्तव्यस्थलका रूपमा विकास भइरहेको र यसको थप प्रचार-प्रसार गरी धेरैभन्दा धेरै पर्यटक भित्रयाउने योजना बनाइएको छ’, उनले भने, ‘आगामी आर्थिक वर्षमा बन्दीपुर घुम्न जाउँ भन्ने अभियानलाई सफल बनाउन प्रचार-प्रसारमा जोड दिन्छौँ ।’

बन्दीपुरलाई पर्यटकीय केन्द्र बनाइने र त्यसका लागि पूर्वाधार निर्माणमा जोड दिइने अध्यक्ष थापाले बताए । उनले भने, ‘बन्दीपुर गाउँपालिकाका छ वटै वडामा रहेका पर्यटकीय गन्तव्यलाई विकास गरिने नीति लिइएको छ ।’

‘देशका मुख्य सहर काठमाडौं, पोखरा, बुटवल र विराटनगरमा बन्दीपुर घुम्न जाउँ अभियान सम्बन्धी प्रवर्द्धनात्मक कार्यक्रम सञ्चालन गरिनेछ’, उनले भने, ‘पर्यटकीयस्थलको सर्ंवर्द्धन र प्रवर्द्धन गरी गाउँपालिकालाई पर्यटनका माध्यमबाट समृद्ध बनाउने सोच राखिएको छ ।’

गाउँपालिकाभित्र रहेका होमस्टेको विकास, पर्यटकीय लक्षित उत्पादनलाई प्राथमिकतामा राखिएको छ । गाउँपालिकाभित्र जीप फ्लायर र रक क्लाइम्बिङको सम्भाव्यता अध्ययन गरिने कार्यक्रम बनाइएको अध्यक्ष थापाले बताए ।

पर्यटकीय नगरी बन्दीपुर भित्रिने पर्यटकको लगत राख्न पर्यटन सूचना केन्द्र स्थापना गरिने छ भने होमस्टेको संरक्षण, संवर्द्धन र प्रवर्द्धन गरी होमस्टे सर्किटको विकास गर्ने नीति लिइएको अध्यक्ष थापाले बताए ।

गाउँपालिकाले आगामी माघ महिनामा सिद्धगुफा महोत्सव आयोजना गरी सिद्धगुफाको प्रचार-प्रसार गर्ने लक्ष्य राखेको छ । बन्दीपुर बजारलाई थप आकर्षक बनाइने र यसलाई पौराणिक सहरका रूपमा विकास गरिने लक्ष्य राखिएको छ ।

अध्यक्ष थापाले भने, ‘बन्दीपुरका मुख्य बजार क्षेत्र संरक्षित क्षेत्र घोषणा भएको र यहाँ घर निर्माण गर्दा मौलिकता झल्किने खालको हुनुपर्ने नीतिलाई निरन्तरता दिइएको छ ।’ उनले भने, ‘सहासिक, धार्मिक र एग्रो टुरिजमसमेत सम्भावना भएकाले सोका लागि कार्यक्रम बनाउने र समग्र बन्दीपुरको जनजीवन, भाषा, कला, संस्कृति, भेषभूषा, चार्डपर्व, रहनसन र रीतिरिवाज झल्कने संग्रहालय निर्माणकार्यको प्रारम्भ गरिने छ ।’

उज्ज्यालो बन्दीपुर कार्यक्रमलाई बजार क्षेत्रलगायत पर्यटकीय गाउँमा थप विस्तार गर्ने, पर्यटकीय क्षेत्र र गाउँका बाटा र गल्लीमा ढुङ्गा छपनीकार्यलाई थप विस्तार गर्ने कार्यक्रम अगाडि ल्याइएको छ । बन्दीपुर गाउँपालिका भित्र रहेका पर्यटकीयस्थलमा थप क्युआर कोडमार्फ प्रवर्द्धन प्रभावकारी बनाउने नीति अवलम्बन गरिएको अध्यक्ष थापाले बताए ।

यस्तै, मुकुन्देश्वरी पदमार्गको निर्माणलाई निरन्तरताका साथ थप विस्तार गर्दै हाफ म्याराथन र साइक्लिङजस्ता पर्यटन प्रवर्द्धन लक्षित कार्यक्रम सञ्चालन गर्ने, बन्दीपुरको छिम्केश्वरी माईको दर्शनका लागि विशेष कार्ययोजना बनाई प्याकेजका रूपमा अगाडि बढाउन निजी क्षेत्रलाई प्रोत्साहन गरिने भएको छ ।

गाउँपालिकाले जनप्रतिनिधिका छोराछोरी सामुदायिक विद्यालयमा अनिवार्य पढाउनुपर्ने नीति कार्यान्वयन गर्ने भएको छ । त्यस्तै, ‘स्वास्थ्य बीमाः बन्दीपुरको जिम्मा’ भन्ने नारासहित अतिगरिब विपन्न जनतालाई निःशुल्क स्वास्थ्य बीमा गर्ने भएको छ।

गाउँपालिकाले कृषि, पशुपालन लगायतका क्षेत्रलाई पनि पर्यटनसंग जोड्दै लग्ने नीति बनाएको छ । फलफूल, तरकारी, धान, कोदो, मकै लगायतका कृषि उपजको उत्पादन वृद्धिका लागि पकेट क्षेत्रका रुपमा विकास गर्ने र उत्पादनमा आधारित अनुदानका कार्यक्रमलाई प्रभावकारी रुपमा अगाडि बढाउने नीति गाउँपालिकाले लिएको छ ।