पृथ्वीराजमार्ग अन्तर्गत तनहुँको रिमाल्नीमा छ सवारीसाधन ठोक्किदा चार जना घाइते
दमौली । पृथ्वीराजमार्ग अन्तर्गत तनहुँको बन्दीपुर गाउँपालिका-१ रिमाल्नीमा बुधबार दिउँसो छ सवारीसाधन ठक्कर खॉदा चार जना घाइते भएका छन् । राजमार्गमा ट्रक, बस, माइक्रो र बोलेरो ठक्कर खॉदा चार जना घाइते भएका हुन् ।
दमौली तर्फबाट डुम्रे तर्फ जाँदै गरेको ना ५ ख २०३४ नं. को बसको ब्रेक फेल हुँदा सोही दिशा तर्फ जाँदै गरेको ग ३ ख १३९० न.को ट्रकलाई ठक्कर दिई बस अनियन्त्रित हुँदा सोही दिशामा जादै गरेको ग ३ च ८३९० न.को बलेरोलाई ठक्कर दिएको थियो ।
उक्त बोलेरो गाडीले सोही दिशामा जादै गरेको ग १ ख ९५६१ नम्बरको बसलाई ठक्कर लाग्न गई उक्त बसले ना १ च ८४३४ न.को बलेरो, उक्त बलेरोले ना २ ख ३७८९ न.को हाइसलाई ठक्कर दिएको प्रहरी नायब उपरिक्षक दीपक रायले जानकारी दिए ।
घाइते हुनेहरुमा बोलेरो चालक मकवानपुर थाहा नगरपालिका-७ बस्ने २४ वर्षीय नवराज गोले, सवार बागलुङ काठेखोला गाउँपालिका-५ बस्ने ५९ वर्षीय देवीलाल कंडेल, सोही ठाउँ बस्ने ४९ वर्षीया विमला कंडेल र सहचालक रौतहट गजुरा नगरपालिका-५ बस्ने ४६ वर्षीय निरतारिक बाबु रहेका छन् ।
घाइतेहरुको डुम्रेस्थित लक्ष्मी अस्पतालमा उपचार भइरहेको प्रहरीले जनाएको छ ।
