भिमादको बुढुवा खोलामा ट्रस पुल निर्माण
भिमाद : तनहुँको भिमाद नगरपालिका–३ स्थित बुढुवा खोलामा पुल निर्माण गरिएको छ । बर्खायाममा खोलामा बाढी आउँदै स्थानीयले सास्ती झेल्नुपरेपछि एक महिनामै ट्रस पुल निर्माण सम्पन्न गरिएको छ ।
वडा कार्यालयको रु ४० लाखको लागतमा २८ मिटर लम्बाइ भएको ट्रस पुल निर्माण गरिएको हो । छोटो समयमै काम सम्पन्न गरेर पुल सञ्चालनमा ल्याइएको भिमाद नगरपालिका–३ का वडाध्यक्ष पदम सेन ठकुरीले बताए । सुनसरीस्थित आस्था निर्माण सेवाले पुल निर्माणको जिम्मा लिएको थियो ।
वडाध्यक्ष ठकुरीले भने, ‘अन्तत वडा नम्बर ३ वासीको सपना साकार भयो, बुढुवाखोलाको सास्तीबाट अबदेखि मुक्त भइयो।’ वडा कार्यालय नजिकै रहेको यो पुल निर्माण पश्चात् सर्वसाधारणलाई सहज हुने उनको भनाइ छ ।
खोलामा पुल नहुँदा बुढुवा खोला उर्लिदा वारपार गर्न समस्या हुन्थ्यो । हिउँदमा समस्या नभएपनि बर्खामा यहाँबाट वारपार गर्न मुस्किल रहेपछि वडा कार्यालयकै पहलमा पुल निर्माण गरिएको बताइएको छ ।
यस्तै, उक्त पुलको नगरप्रमुख दधिराज सुवेदी र उपप्रमुख शारदा खनालले उद्घाटन गरेका छन् ।
