१८औ सचिन स्मृति दौडको उपाधि भरतले जिते
- भञ्ज्याङ समाचारदाता (दमौली)
रोर्टयाक्ट क्लव अफ दमौलीले स्व. सचिन श्रेष्ठको स्मृतिमा शनिबार आयोजना गरेको १८औ सचिन स्मृति दौडको उपाधि भरत गुरुङले जितेका छन । दमौली अनसनचोकदेखि छाब्दी बसपार्कसम्मको ९ किमि दूरी ३० मिनेटमा पार गर्दै भारतीय सेनामा कार्यरत गुरुङले उपाधि जितेका हुन् । प्रतियोगितामा गोरखाका दिनेश बोगटी द्वितीय, धनगढीका वीरेन्द्रप्रसाद भट्टराइ तृतीय भएका छन । त्यस्तै व्यास नगरपालिका-१३ का संगम घर्ती सान्त्वना भए । उनीहरुले क्रमशः उक्त दूरी ३२ मिनेट २५ सेकेण्ड, ३२ मिनेट ५० सेकेण्ड र ३३ मिनेट १० सेकेण्डमा पार गरेका हुन् ।
त्यस्तै महिलातर्फ ४३ मिनेटमा उक्त दूरी पार गर्दै व्यास नगरपालिका-१० का नम्रता गुरुङ र ४३ मिनेट ३० सेकेण्डमा उक्त दूरी पार गर्दै व्यास नगरपालिका-४ की करुणा श्रेष्ठ सान्त्वना भएको प्रतियोगिताका संयोजक विशाल श्रेष्ठले जानकारी दिए । प्रतियोगितामा ८० धावकको सहभागिता रहेको थियो । प्रतियोगितामा प्रथमलाई रु १० हजार १०, द्वितीय हुनेलाई रु ८ हजार ८ र तृतीय हुनेलाई रु ६ हजार ६ पुरस्कार प्रदान गरिएको छ । विगतका वर्षहरुमा प्रशासनचोकबाट शुरु भई घाँसीकुवा पुगेर पुनः प्रशाचनचोकमा आएर दौड प्रतियोगिता सकिने गरेपनि यस पटक दौडको रुट परिवर्तन गरिएको हो । छाब्दीवाराही मन्दिरको धार्मिक पर्यटन प्रबर्द्धनका लागि पनि दौडले सहयोग पुग्ने क्लवका अध्यक्ष राजकुमार श्रेष्ठले बताए ।
यसअघि प्रतियोगिताको उदघाटन गर्दै व्यास नगरपालिकाका प्रमुख बैकुण्ठ न्यौपानेले दौडले युवालाई जोश जाँगर मात्रै होइन स्वस्थ बन्न सहयोग पुग्ने बताए । नगरपालिकाले सहिद दिवसका अवसरमा प्रत्येक वर्ष मानुङदेखि पुलिमराङसम्म अल्ट्रा म्याराथन गर्दै आएकामा यस वर्षदेखि नारी दिवसमा व्यासगुफादेखि तनहुँसुरसम्म महिला हाफ म्याराथन गर्न लागेको जानकारी दिए । कार्यक्रममा रोटरी क्लवका सचिव सागर पौडेल, रोटर्याक्ट क्लवका पूर्व अध्यक्ष शिखरलाल डोटेल लगायतले सन् २००३ मा क्लव स्थापना भएदेखि सामाजिक काम गर्दै आएको बताए ।
