तनहुँको भानु-२ का अपाङ्गता भएका व्यक्तिलाई खाद्यान्न सहयोग

तनहुँको भानु नगरपालिका-२ फुस्रेटारका अपाङता भएका ५२ बर्षीय सुर्य नेपालीको परिवारलाई इन्सेकले खाद्यान्न उपलब्ध गराइएको छ । इन्सेक प्रतिनिधि प्रकाशचन्द्र भट्टराइ तथा मानवअधिकार समुहका सदस्य सीता अधिकारी र खिमकुमारी गुरुङले बुधबार नेपालीको घरमै पुगेर एक बोरा चामल र एक महिनाको लागि पुग्ने दाल, नुन र तेल उपलब्ध गराएका थिए ।

दृष्टि विहिन र सुस्त श्रवण समेत भएका नेपाली मागेर जिविको पार्जन गर्ने गर्दछन् । उनकी पत्नी ४८ बर्षीया कालीमाया नेपाली पनि शारीरिक रुपमा कमजोर अस्वस्थमा छिन् । कोभिडको दोश्रो लहर सुरु भएपछि जारी गरिउको निषेधाज्ञाका कारण उनिहरुको परिवारमा समस्या पर्दै आएको थियो ।

मानवअधिकार समुह भानु नगरपालिकाको बुधबार भएको भर्चुअल बैठकमा सदस्यहरुले जानकारी गराएपछि सोही दिन नेपालीको परिवारलाई खाद्यान्न सहयोग उपलब्ध गराइएको बताइएको छ । आर्थिक अवस्था निकै कमजोर भएका नेपाली यस अघि सँधै नगरपालिका कार्यालय नजिकै माग्न जाने र त्यसैबाट संकलित पैसाले जिविकोपाजर्न गर्दै आएको उनका भाई प्रेमबहादुर नेपालीले बताए । निषेधाज्ञापछि माग्न जाने बाटो पनि बन्द भएको कारण विहान बेलुकीको छाक र्टार्न समस्या भएपछि छिमेकीहरुले कहिलेकाँही सहयोग गरेको बताए ।

यस्तै, मानवअधिकार समुह भानु नगरपालिकाले विश्वव्यापी महामारीको रुपमा फैलिएको कोभिड-१९ को दोश्रो लहरको सामना गर्न सबै सरोकारवालासँग सहकार्य र हातेमालो गर्न भानु नगरपालिकाको ध्यानाकर्षण गराएको छ । मानवअधिकार समुहले बुधबार भानु नगरपालिकामा ध्यानकर्षापत्र बुझाउँदै कोभिडलाई परास्त गर्न सबै सरोकारवालाहरुसँग सहकार्य गर्नु पर्ने र नागरिकको स्वास्थ्यको अधिकार प्रति विशेष ख्याल गर्नु पर्ने माग गरेको हो । समुहका संयोजक कृष्णराज धमनीयाले कोभिडबाट भानु नगरपालिका पनि प्रभावित बनेको र कोभिडको दोश्रो लहर सुरु भएपछि भानु नगरपालिकामा मात्रै १६९ जना संक्रमित भएकोमा हाल १०६ जना सक्रिय संक्रमित रहेको र ५ जनाको मृत्यु भएको उल्लेख गरे ।

प्रमुख प्रशासकीय अधिकृत भिमप्रसाद तिवारीले ध्यानाकर्षण पत्र बुझ्दै कोभिडको व्यवस्थापनमा नगरपालिका सबै सरोकारवालाहरुसँग हातेमालो गरेर अगाडी बढ्ने बताए । साथै आगामी वर्षो योजनामा शिक्षा, स्वास्थ्य र खाद्यलाई प्राथमिकतामा राखेर योजना बनाउने उनले प्रतिबद्धता जनाए ।

सेयर गर्नुहोस्

प्रतिक्रिया दिनुहोस्

सम्बन्धित खवर