प्राकृतिक रुपमै लकडाउनमा बन्दिपुर : विद्युत्, टेलिफोन, इन्टरनेट र खानेपानी समेत अवरुद्ध
भञ्ज्याङ समाचारदाता
पहाडकी रानी उपनामले परिचित तनहुँको पर्यटकीयस्थल बन्दिपुर अहिले प्राकृतिक रुपमै लकडाउनमा परेको छ । बिगत तीन दिनदेखि परेको वर्षासंगै आएको बाढीपहिरोले गाउँपालिकामा ठूलो क्षति पुर्याएको छ ।
गाउँपालिकाको कार्यालय बन्दिपुर तथा वडा कार्यालयहरुमा जाने मोटर मार्गहरु समेत पहिरोका कारण बन्द हुँदा अहिले प्राकृतिक रुपमै गाउँपालिका लकडाउनको अवस्थामा रहेको गाउँपालिकाका अध्यक्ष पूर्णसिंह थापाले बताए ।
‘गाउँपालिकाको कार्यालय समेत म जान सकेको छैन । मोटर बाटो सबै पहिरोले भत्काएको छ, वडा कार्यालयहरुमा पनि जान सक्ने अवस्था छैन’, अध्यक्ष थापाले भने, ‘बन्दिपुरमा अहिले टेलिफोन, इन्टरनेट, विद्युत् र खानेपानी सेवा समेत अवरुद्ध भएको छ ।’
तीन दिनदेखि परेको अबिरल वर्षाले पहिरो जाँदा विद्युतका पोल ढाल्नुका साथै खानेपानीका मुहान र पानी संकलन ट्याङ्की समेत भत्काइदिएको छ ।
बन्दिपुर गाउँपालिका क्षेत्रका अधिकांश खेत बगरमा परिणत भएका छन् । पहिरोमा परी २ जनाको मृत्यु भएको छ, ५/६ जना घाइते हुनु भएको छ । ठूलोमात्रमा भौतिक क्षति पुगेको गाउँपालिका अध्यक्ष थापाले बताए ।
मुकुन्देश्वरी डाँडाबाट पहिरो खस्दा खानेपानीको मुहान तथा ट्याङ्की भत्काएर क्षति बनाएको छ । करिब २० करोड रुपैयाँको लागतमा सम्पन्न भएको छापनाहाला खानेपानी ट्याङ्की पूर्ण क्षति बनाउँदा डुम्रे बजारबासीले खानेपानीको समस्या भोग्नुपरेको छ ।
अविरल वर्षाका कारण कृषि बालीमा समेत क्षति पुगेको छ । कृषकको पाकेको चैते धान, मकैबाली तथा भखरै रोपिएको धान खेतीमा समेत ठूलो क्षति पुगेको अध्यक्ष थापाले बताए । उनले भने, ‘बाढीपहिरोले पुर्याएको क्षतिको तथ्याङ्क संकलन भइरहेको र समस्यामा परेका वडाबासिको उद्धार तथा राहतमा हामी अहिले जुटिरहेका छौ ।’
