तनहुँमा शान्तिपूर्ण रुपमा मतदान जारी, दुई प्रतिनिधिसभा सदस्यका लागि २७ जना उम्मेदवार चुनावी मैदानमा

तनहुँ : प्रतिनिधिसभा सदस्य निर्वाचनअन्तर्गत तनहुँमा आज बिहान ७ बजेदेखि शान्तिपूर्ण रुपमा मतदान जारी रहेको छ । जिल्लाका १४४ मतदानस्थलका र ३०९ मतदान केन्द्रमा उत्साहजनक रुपमा मतदाता सहभागि मतदान गरिरहेका छन् ।

निर्वाचनका लागि तोकिएको मतदान केन्द्रहरू, मतदाता तथा मतदान कार्यलाई शान्तिपूर्ण र भयरहित बनाउनका लागि आवश्यक सुरक्षा व्यवस्था चुस्त दुरुस्त गरी मतदान कार्य भइरहेको मुख्य निर्वाचन अधिकृत विष्णु प्रसाद उपाध्यायले बताए ।

सबैले सहज रुपमा मतदान गर्न पाउने गरी शान्ति सुरक्षाको भरपर्दाे प्रबन्ध मिलाइएकाले ढुक्क भएर मताधिकार प्रयोग गर्न मुख्य निर्वाचन अधिकृत उपाध्यायले आग्रह गरेका छन् ।

यस्तै, तनहुँ निर्वाचन क्षेत्र नम्बर १ मा ६९ मतदानस्थल र १५३ मतदान केन्द्र तथा क्षेत्र नम्बर २ मा ७५ मतदानस्थलमा १५६ मतदान केन्द्र कायम गरिएको छ । तनहुँका दुई प्रतिनिधिसभा सदस्यका लागि विभिन्न राजनीतिक दल, स्वतन्त्र गरी २७ जना उम्मेदवार चुनावी मैदानमा उत्रिएका छन् । जिल्लामा दुई लाख ५४ हजार ३९७ मतदाता कायम भएको जिल्ला निर्वाचन अधिकारी विकास लम्सालले जानकारी गराए ।

तनहुँमा पुरुष मतदाताको संख्या एक लाख २३ हजार ४९१ र महिलाको संख्या एक लाख ३० हजार ९०६ कायम छ । दुई प्रतिनिधिसभा निर्वाचन क्षेत्र भएको यहाँ क्षेत्र नम्बर १ मा एक लाख २६ हजार ८८२ र र क्षेत्र नम्बर २ मा एक लाख २७ हजार ५१५ मतदाता कायम छन् ।

यस्तै, प्रतिनिधिसभा सदस्य निर्वाचनअन्तर्गत प्रथम महिला सविता पौडेलले आज व्यास नगरपालिका–२ सत्यवती मावि मतदान केन्द्रबाट मतदान गरेकी छन् ।

मतदान गरेपछि मतदाताहरुले विभिन्न प्रतिक्रिया दिएका छन् । अधिकांश मतदाताहरुले आफुले मतदान गरी विजयी गराएको उम्मेदवारले देशमा शान्ति, सु–व्यवस्था, भ्रष्टाचारको अन्त्य र मुलुकको अस्तित्व संरक्षणमा भूमिका खेल्नुपर्ने अपेक्षा गरेका छन् ।

यस्तै, प्रतिनिधिसभा सदस्य निर्वाचन–२०८२ अन्तर्गत तनहुँका केही उम्मेदवारहरूले आफैँलाई मतदान गर्न नपाउने भएका छन् । मतदाता नामावली अन्य निर्वाचन क्षेत्रमा रहेकाले उनीहरू आफ्नै उम्मेदवारी रहेको क्षेत्रमा मतदान गर्न नपाउने भएका छन् ।

तनहुँ क्षेत्र नम्बर १ का उम्मेदवारहरू डा. स्वर्णिम वाग्ले, रामदत्त जोशी, रामलक्ष्मी दुवाल र प्रेमबहादुर थापा आफैँलाई मत हाल्न नपाउने भएका छन् । उनीहरूको मतदाता नामावली सम्बन्धित निर्वाचन क्षेत्र बाहिर रहेको जनाइएको छ ।

त्यस्तै, तनहुँ क्षेत्र नम्बर २ का उम्मेदवार शंकर भण्डारी र श्रीराम न्यौपाने पनि आफ्नै क्षेत्रमा मतदान गर्नबाट वञ्चित हुने भएका छन् । उनीहरूको मतदाता नामावली तनहुँ क्षेत्र नम्बर १ अन्तर्गत भानु नगरपालिका क्षेत्रमा रहेको बताइएको छ ।

मतदाता नामावली स्थायी बसोबास वा पूर्व दर्ता गरिएको स्थानका आधारमा तय हुने भएकाले उम्मेदवार भए पनि नामावली रहेको स्थानमै मतदान गर्नुपर्ने कानुनी व्यवस्था छ ।

यस्तै, मतदानदेखि मतपेटीका ढुवानी, व्यवस्थापन र गणनासम्मको सम्पूर्ण व्यवस्थापन गरिएको मुख्य निर्वाचन अधिकृत विष्णुप्रसाद उपाध्ययाले बताए । एउटै रुटबाट धेरै ल्याउने भन्दा पनि हरेक बुथबाट मिलाएर यथाशीघ्र राती १२ बजेसम्म दुईवटै निर्वाचन क्षेत्रमा संकलन गर्ने र बुझ्नका लागि पनि धेरैभन्दा धेरै टिम खटाएर मात पेटीका बुझ्ने र स्टोर गर्ने सबै व्यवस्थापन मिलाइएको उनले जानकारी गराए ।

सेयर गर्नुहोस्

प्रतिक्रिया दिनुहोस्

सम्बन्धित खवर