व्यासमा २१ हजार बालबालिकालाई टाइफाइड विरुद्धको खोप लगाउने तयारी

तनहुँको व्यास नगरपालिकाले बालबालिकालाई टाइफाइड विरुद्धको खोप लगाउने तयारी गरेको छ । राष्ट्रव्यापी खोप अभियान अन्तर्गत सञ्चालन गर्न लागिएको टाइफाइड विरुद्धको खोप अभियानका क्रममा नगरपालिका भित्र रहेका करिब २१ हजार बालबालिकालाई टाइफाइड विरुद्धको खोप लगाउन लागिएको हो ।

नगरपालिकाको स्वास्थ्य शाखाले सोमबार खोप समन्वय समितिको अभिमुखीकरण कार्यक्रम गरी अभियान बारे जानकारी गराएको छ ।

चैत २५ गतेदेखि १४ वटै वडाका विद्यालयमा खोप केन्द्र कायम गरी बालबालिकालाई टाइफाइड विरुद्धको खोप लगाइने नगरपालिकाका जनस्वास्थ्य निरीक्षक लक्ष्मी गुरुङले बताइन् ।

‘लक्षित संख्या धेरै र स्वास्थ्यकर्मी सीमित रहेकाले खोप अभियान चुनौतिपूर्ण रहेको छ’, उनले भनिन्, ‘यस अभियानमा सबैको सहयोग आवश्यक छ । सरोकारवालाको भूमिका महत्वपूर्ण रहन्छ ।’

स्वास्थ्य शाखाकी नर्सिङ अधिकृत कल्पना दाहालले लक्षित संख्याको ८० प्रतिशत बालबालिका विद्यालयमा रहने भएकाले विद्यालयमै खोप केन्द्र निर्धारण गरेर खोप दिइने तयारी गरिएको बताइन् ।

अहिले अभियानको रुपमा यसलाई सञ्चालन गरिएपनि पछि नियमित खोप अभियानमा यसलाई समावेश गर्ने तयारी भएको उलने बताइन् ।

विगतमा कुनै खोप लिँदा गम्भीर प्रकारको प्रतिक्रिया देखा परेको वा कुनै खाना वा अन्य वस्तुबाट कडा एलर्जी भएको भए, एड्सको लक्षण देखा परेको अवस्थामा खोप लगाउन नहुने बताइएको छ ।

टाइफाइड खोप लगाएपछि अन्य खोपहरुमा जस्तै केही सामान्य दुखाइ, सुन्निने, हल्का ज्वरो आउने, टाउको दुख्ने, हात गोडा तथा जोर्नीहरु दुख्ने हुने भएपनि विस्तारै ठिक हुने बताइएको छ ।

कार्यक्रममा व्यास नगरपालिकाका प्रमुख वैकुण्ठ न्यौपानेले खोप अभियान सफल पार्न सबैको भूमिका महत्वपूर्ण रहने बताउँदै खोप अभियान विश्वसनीय बनाउन वातावरण सिर्जना गर्नुपर्नेमा जोड दिए ।

कार्यक्रममा व्यास नगरपालिकाका उपप्रमुख मीरा जोशी, प्रमुख प्रशासकीय अधिकृत डिल्लीराम सिग्देल, प्रवक्ता एवं वडाध्यक्ष मोहनकुमार श्रेष्ठ, विभिन्न विद्यालयका प्रधानाध्यापक लगायतको सहभागिता रहेको बताइएको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर