पल शाहलाई तनहुँ अदालतबाट सफाई
नायक पल शाहालाई तनहुँ जिल्ला अदालतले सफाई दिएको छ । नाबालिक जबरजस्ती करणीको अभियोगमा तनहुँ कारागारमा थुनामा रहेका शाहलाई तनहुँ अदालतले बुधबार सफाई दिएको हो ।
जिल्ला न्यायाधीश कोमलप्रसाद आचार्यको इजलासमा बुधबार बहस सकिएपछि शाहलाई अदालतले सफाई दिएको छ ।
शाह विरुद्धको सुनुवाईमा अदालतले अभियोग दाबी नपुग्ने फैसला सुनाएको तनहुँ अदालतका श्रेस्तेदार मीनबहादुर कुंवरले जानकारी दिए । उनले भने, ‘तनहुँ अदालतमा दर्ता भएको शाह विरुद्धको मुद्दामा अदालतले सफाई दिने फैसला सुनाएको छ ।’ उनका अनुसार फैसला उपर चित्त नबुझे पीडित पक्षलाई पुनरावेदन जाने छुट रहेको छ ।
शाह विरुद्धको मुद्दाको पेशी तनहुँ अदालतमा पटक-पटक तोकिएर स्थगित हुँदै आएको थियो । उक्त मुद्दाको अन्तिम सुनुवाईमा बुधबार वरिष्ठ अधिवक्ता कमलामोहन वाग्ले, परशुराम गिरी, कृष्णबहादुर थापा र अधिवक्ता भानुभक्त सुवेदीले बहस गरेका थिए ।
तनहुँ अदालतले शाहलाई सफाई दिएपनि उनी कारागारमै रहनेछन् । एक बालिकालाई बलात्कार गरेको आरोपमा तनहुँ र नवलपरासी पूर्वमा शाहमाथि मुद्दा दायर भएको थियो । सोही मुद्दामा जिल्ला अदालत नवलपरासी पूर्वले भने शाहलाई बलात्कार मुद्दामा सफाइ दियो भने बाल यौन दुरुपयोग आरोपमा २ वर्ष ६ महिना जेल सजाय र पीडितलाई १० लाख रुपैयाँ क्षतिपूर्ति दिनुपर्ने फैसला गरेको थियो ।
शाहले उक्त फैसला उपर गत कात्तिक २५ गते उच्च अदालतमा पुनरावेदन निवेदन दिएका थिए ।
नावालिकमाथि जबरजस्ती करणी गरेको भन्दै शाहविरुद्ध गत फागुन ११ गते तनहुँ प्रहरीमा उजुरी परेको थियो । शाहले फागुन १५ गते प्रहरी कार्यालयमा आत्मसमर्पण गरेका थिए । शाहलाई चैत १० गते तनहुँ अदालतले पुर्पक्षका लागि थुनामा पठाउने आदेश दिएको थियो।
