एसइइ परीक्षा दिने विद्यार्थीको विवरण पेश गर्न व्यास नगरपालिकाको निर्देशन

तनहुँको व्यास नगरपालिकाले नगर क्षेत्रभित्रका विद्यालयलाई एसइइ परीक्षा दिने विद्यार्थीको विवरण १० दिनभित्र पेश गर्न निर्देशन दिएको छ ।

नगरप्रमुख बैकुण्ठ न्यौपानेको अध्यक्षतामा शुक्रबार बसेको नगर कार्यपालिकाको बैठकले नगरपालिका भित्रका माध्यमिक विद्यालयमा २०७८/०७९ मा एसइइ परीक्षा दिने विद्यार्थीहरुका गणित, विज्ञान, अंग्रेजी विषयको विद्यार्थी विवरण, नतिजाको अवस्था र सम्बन्धित शिक्षकहरुको विवरण १० दिन भित्र पेश गर्न शिक्षा तथा सामाजिक विकास शाखालाई निर्देशन दिने निर्णय गरेको हो ।

यस्तै, कार्यपालिकाले यस वर्ष स्थानीय धावकहरु बीच मात्र मानुङ-पुलिमराङ अल्ट्रा म्याराथन प्रतियोगिता गर्ने भएको छ । व्यास नगरपालिकाले प्रत्येक वर्ष माघ १६ गते सहिद दिवसका दिन आयोजना गर्दै आइरहेको अल्ट्रा म्याराथन यस वर्ष पनि आयोजना गर्ने निर्णय गरेको छ ।

नगरपालिकाले व्यास नगरपालिका-५ मानुङदेखि व्यास नगरपालिका-८ पुलिमराङसम्म अल्ट्रा म्याराथन गर्दै आएको छ । विगतका वर्षहरुमा देशभरका धावकको सहभागिता रहने प्रतियोगितामा यस वर्ष भने स्थानीय धावकको मात्र सहभागिता रहने नगरपालिकाका प्रवक्ता जीवन गुरुङले बताए । खर्चलाई मितव्ययी बनाउन यसपटक स्थानीय धावकको सहभागितामा मात्र प्रतियोगिता आयोजना गर्ने निर्णय गरिएको उनले बताए ।

यस्तै, नगरपालिकाले विगतका वर्षमा भन्दा यस वर्ष प्रतियोगिताको पुरस्कार राशि घटाउने भएको छ । त्यसका लागि केही दिनमा पुरस्कारको राशि निर्धारण गरिने गुरुङले बताए । गुरुङका अनुसार ‘मितव्ययी तरिकाले प्रतियोगिता सम्पन्न गर्न यो निर्णय गरेका हौ, समिति बनाएर पुरस्कारको राशी निर्धारण गरिन्छ ।’

गत वर्ष आयोजित प्रतियोगिताको उपाधि नेपाली सेनाका बेदबहादुर सुनुवारले जितेका थिए । गत वर्ष आयोजित प्रतियोगिताको पहिलो पुरस्कार राशि ८७ हजार ७८ रुपैयाँ प्रदान गरिएको थियो । नगरपालिकाले म्याराथनलाई पर्यटन प्रबर्द्धनसँग जोड्न खोजेको छ । मगर र गुरुङ गाउँलाई खेलकुदबाट जोडेर प्रचारप्रसार गर्ने उद्देश्य राखिएको नगरप्रमुख वैकुण्ठ न्यौपानेले बताए ।

व्यास नगरपालिका-५ मानहुँबाट शुरु हुने म्याराथन व्यास नगरपालिका-८ पुलिमराङसम्म ४४ किमी दूरीको छ । म्याराथन मानहुँकोट सिद्ध मार्ग हुँदै अलैचे-चापाघाट-अनसन चौतारी-सफासडक-भोर्लेटार चोक-बैरेनी-दुम्सी-कलेस्ती-पाथ्रा-सत्रसय-बानियाँ डिही-बर्लाची-सोतीवेशी-बगुवा रिस्ती-बाहुन पोखरा हुँदै पुलिमराङमा पुगेर सकिनेछ ।

यस्तै, नगरपालिकाले चैत ३० गते स्थापना दिवस मनाउने निर्णय गरेको छ । कार्यपालिकाको बैठकले स्थापना दिवसका अवसरमा विभिन्न क्षेत्रका उत्कृष्ट योगदानदातालाई सम्मान गर्न उपप्रमुख इन्दिरा दरैको अध्यक्षतामा पाँच सदस्यीय समिति गठन गर्ने भएको छ ।

बैठकले सञ्चारकर्मी सहयोग सम्बन्धी कार्यविधि, २०७९ पारित गर्ने निर्णय गरेको छ । सडक बोर्ड अन्तर्गत मर्मतसम्भार गर्नुपर्ने बाटोहरुको प्राप्त स्रोत सीमाभित्र रही लगत इष्टमेट तयार गरी माघ मसान्तभित्र पेश गर्न सम्बन्धित शाखाहरुलाई निर्देशन दिने निर्णय बैठकले गरेको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर