बन्दीपुरमा बजार अनुगमन

तनहुँको बन्दीपुर गाउँपालिकाले पालिकाभित्रका बजार क्षेत्रमा सञ्चालित खाद्यान्न, किराना, होटल लगायतको अनुगमन गरेको छ । खाद्यान्न तथा दैनिक उपभोग्य वस्तुमा मूल्यबृद्धि, मिति नाघेका वस्तुको बिक्री वितरण भए नभएको बिषयमा अनुगमन गरिएको हो । गाउँपालिकाका उपाध्यक्ष एवं अनुगमन समितिका संयोजक पञ्चमाँया गुरुङको नेतृत्वमा विहीबार वडा नं. १ स्थित डुम्रेबजारमा अनुगमन गरेको हो ।

ब्यवसायीहरुले अखाद्य बस्तुहरु बिक्री गरेको, आवश्यक प्रक्रियानै पूरा नगरी व्यवसाय सञ्चालन गरेको, मूल्यसूची नराखेको, नवीकरण नगरको पाइएकाले तत्काल सच्याउन आवश्यक निर्देशन दिइएको गाउँपालिका उपाध्यक्ष पञ्चमाँया गुरुङले बताइन् । अनुगमनका क्रममा मिठाइ, मसला, जुस लगायतका केही सामग्री अखाद्य, म्याद गुज्रिएका भेटिएकाले अनुगमन टोलीले उक्त वस्तु जफत गरेको उनले बताइन् । अनुगनलाई अझै प्राथमिकताका साथ अगाडि बढाउने उनले बताइन् ।

चाडपर्वको समयमा मात्रै औपचारिकता निभाउनको लागि बजार अनुगमन गरिन्छ भन्ने भ्रम चिर्न अनुगमन गरिएको उनले बताइन् । अनुगमन टोलीले खाद्य सामग्रीको म्याद, गुणस्तर, नापतौलको अवस्था, व्यवसायीले सम्बन्धित निकायमा दर्ता आबद्धता कागजातहरू सबैले देख्ने गरी राख्ने गरे-नगरेको, व्यवसायको नाम, मूल्यसूची हेर्नुका साथै प्यान र पसल दर्ता गरिएको फर्म उपभोक्ताले देख्ने गरी राख्न व्यवसायीलाई निर्देशन दिएको छ ।

सर्वसाधारणको गुनासो आएपछि वडा नं. १ मा रहेका विभिन्न २७ वटा मिठाइ पसल, किराना पसल लगायतमा अनुगमनका गरिएको थियो । यस अघि पनि डुम्रेबजारका केही पसलहरुलाई जरिबाना गरिएको थियो । बजार अनुगमनमा वडा नं. १ र ४ का जनप्रतिनिधि, राजश्व प्रमुख दिनेश पौडेल, उद्योग बाणिज्य संघ डुम्रेबजार इकाइका अध्यक्ष हेमलाल भि.के., प्रहरी चौकी डुम्रेका प्रहरीको समेतको टोली सहभागि थियो ।

सेयर गर्नुहोस्

प्रतिक्रिया दिनुहोस्

सम्बन्धित खवर