तनहुँ उद्योग वाणिज्य संघको सबै पदमा सर्वसम्मत
तनहुँ उद्योग वाणिज्य संघको सबै पदमा सर्वसम्मत गरी नयाँ नेतृत्व चयन गरिएको छ । संघको गत पुस २८ गतेबाट सुरु भएको १७औं अविधेशनले बुधबार प्रथम र द्धितीय उपाध्यक्ष पदमा पनि सहमति गरेसंगै सबै पद र्सवसम्मत निर्वाचित गरिएको हो ।
संघको नयाँ नेतृत्वका लागि अन्य पदमा यसअघि नै सहमति भएपनि प्रथम र द्वितीय उपाध्यक्ष पदमा सहमति जुटेको थिएन ।
उम्मेदवारी फिर्ता लिने अन्तिम दिन बुधबार संघको प्रथम उपाध्यक्षमा कुमार मल्ल र द्वितीय उपाध्यक्षमा दिनेशकुमार श्रेष्ठमा सहमति जुटेपछि मल्ल र श्रेष्ठ सर्वसम्मत निर्वाचित भएका हुन् । मल्ल यसअघि द्वितीय उपाध्यक्ष र श्रेष्ठ कोषाध्यक्ष थिए ।
प्रथम उपाध्यक्षमा सुरेश पुरी र राजकुमार श्रेष्ठ (राकु)ले उम्मेदवारी फिर्ता लिएका छन् । त्यस्तै द्वितीय उपाध्यक्षमा शिवओम मल्ल र शकुन्तला आलेले उम्मेदवारी फिर्ता लिएको निर्वाचन प्रबन्ध समितिका संयोजक डम्बरदेव हड्खलेले जानकारी दिए ।
संयोजक हड्खलेका अनुसार संघको अध्यक्षमा वैकुण्ठनाथ मिश्र, वरिष्ठ उपाध्यक्षमा इमकुमार मल्ल, कोषाध्यक्षमा भिमलाल श्रेष्ठ र वस्तुगत सदस्यमा निर्माण व्यवसायी संघबाट सुवर्ण श्रेष्ठ सर्वसम्मत निर्वाचित भइसकेका छन् ।
संघको नेतृत्व सर्वसम्मत निर्वाचित गराउनका लागि वरिष्ठ उपाध्यक्ष पद थप गरी पूर्व अध्यक्षहरुले पहल गरेका थिए ।
