व्यासका २०६ जना विद्यार्थीलाई छात्रवृत्ति वितरण
तनहुँको व्यास नगरपालिका कार्यालयले २०८१/०८२ मा २०६ विद्यार्थीलाई छात्रवृत्ति बापत रकम उपलब्ध गराएको छ। नगरपालिकाले १८ लाख ४८ हजार ५०० रुपैयाँ छात्रवृत्तिका रकम वितरण गरेको हो । कक्षा १२ भन्दा माथिका ३९ जना विद्यार्थीलाई ११ हजार रुपैयाँका दरले र कक्षा ९ देखि १२ सम्मका १६७ जनालाई आठ हजार ५०० रुपैयाँका दरले छात्रवृत्ति प्रदान गरेको छ । आर्थिक अवस्था नाजुक भएका गरिब तथा जेहेन्दार विद्यार्थीका लागि उच्च शिक्षा हासिल गर्न छात्रवृत्ति प्रदान गरेर पढ्ने वातावरण मिलाइदिएको नगरपालिकाले जनाएको छ ।
शिक्षाबाट कोही पनि वञ्चित हुन नपरोस् भनि नगरपालिकाले शिक्षा क्षेत्रमा बर्सेनि ठूलोे रकम लगानी गर्दै आएको व्यासका प्रमुख प्रशासकीय अधिकृत काशीराम गैरेले बताए । उनले भने, “नगरपालिकाले स्थानीय पाठ्यक्रम निर्माण गरी लागू गरेको छ, शैक्षिक क्यालेन्डर निर्माण गरी सोही आधारमा विद्यालयमा शैक्षिक कार्यक्रम सञ्चालन गर्दै आएको छ ।”
कक्षा ५ र ८ को परीक्षा सञ्चालन गरी शैक्षिक गुणस्तर मापन कार्य गरिएको नगरपालिकाले जनाएको छ । राष्ट्रिय शिक्षा दिवस २०८१ को अवसरमा उत्कृष्ट विद्यालय, उत्कृष्ट शिक्षक, दीर्घ सेवारत शिक्षक, निवृत्त शिक्षक गरी ४९ र १२ उत्कृष्ट विद्यार्थीलाई पुरस्कृत एवं सम्मान गरेको थियो। राष्ट्रिय बाल दिवस २०८१ का अवसरमा अन्तर विद्यालय विभिन्न प्रतियोगितात्मक कार्यक्रम सञ्चालन गरी उत्कृष्ट चार विद्यार्थीलाई पुरस्कृत गरिएको थियो ।
संघीय शिक्षण सिकाइ सहयोग अनुदानमा माध्यमिक र आधारभूत तहको २३ कोटामा विषयगत शिक्षक पदपूर्ति गरिएको नगरप्रमुख वैकुण्ठ न्यौपानेले बताए । उनले भने, “प्रसूति बिदामा रहेका १३ शिक्षकको सट्टामा सुत्केरी सट्टा शिक्षक व्यवस्थापन गरी पठनपाठन कार्यलाई सञ्चालन गरिएको थियो।”
