तनहुँमा लम्बियो निषेधाज्ञा, उल्लंघन गर्नेलाई कारवाही गरिने (प्रशासनको आदेश सहित)
भञ्ज्याङ न्यूज
तनहुँमा जारी निषेधाज्ञा भाद्र ७ गतेसम्म लम्ब्याइएको छ । सोमबार मध्यरातबाट लागुहुने निषेधाज्ञाका क्रममा यसपाली फलफूल र तरकारी पसल भने बिहान मात्र र होटल रेष्टुरेन्ट दिउँसो र साँझ मात्र खोल्न दिइने भएको छ ।
जिल्ला कोभिड संकट व्यवस्थापन समितिको बैठकले तरकारी, फलफूल खाद्यान्न पसल बिहान ५ देखि १० बजेसम्म खोल्न दिन सिफारिस गरे अनुसार जिल्ला प्रशासन कार्यालय तनहुँले उक्त सिफारिसलाई कार्यान्वयनमा ल्याएको हो ।
यसैगरी, अरु व्यवसाय तथा रेष्टुरेन्ट भने बिहान ११ देखि ६ बजेसम्म खोल्न दिइने भएको छ । बैठकले अबका दिनमा कोभिड संक्रमितको उपचारका लागि दमौली अस्पताल र जीपी कोईराला राष्ट्रिय स्वासप्रस्वास केन्द्रलाई अनुमति दिने निर्णय गरेको सहायक प्रमुख जिल्ला अधिकारी चित्राङ्गत बरालले जानकारी गराए ।
प्रमुख जिल्ला अधिकारी सागर आचार्यका तर्फाट जारी आदेशमा निषेधाज्ञालाई केही खुकुलो बनाइएको छ । तनहुँमा सक्रिय संक्रमित बढिरहेको र छिमेकी जिल्लामा डेल्टा भेरियन्टको संक्रमण देखिएको भन्दै निषेधाज्ञा लम्ब्याउने निर्णय भएको बताइएको छ ।
स्वास्थ्य र सुरक्षाका मापदण्ड पूरा गरेरमात्र रेष्टुरेन्ट तथा खाजाघरका साथै अन्य पेशा व्यवसाय सञ्चालन गर्नुपर्ने व्यवस्था गरिएको छ । स्वास्थ्य सुरक्षाको मापदण्ड पालना नगरी आउने ग्राहकसंग व्यापार नगर्न र व्यवसायीले समेत स्वास्थ्य सुरक्षाको मापदण्ड पूर्णरुपमा पालना गर्नु भनिएको छ ।
मास्क नलगाई आउनेलाई सेवा वा बस्तुको विक्री गरेमा त्यस्तो व्यवसायीलाई कारवाही गरिने निर्णय समेत भएको छ । निषेधाज्ञाको उल्लंघन गरेमा कोभिड-१९ संकट व्यवस्थापन सम्बन्धमा व्यवस्था गर्न बनेको अध्यादेश २०७८ को दफा ४ तथा स्थानीय प्रशासन ऐन २०२८ को दफा ६ बमोजिम कारवाही गरिने सहायक प्रमुख जिल्ला अधिकारी बरालले बताए ।
तनहुँमा पछिल्लो केही दिन यता कोरोना संक्रमितको संख्या दैनिक बढ्दै गएको छ । जिल्लामा सक्रिय संक्रमितको संख्या ४७६ पुगेको छ । निषेधाज्ञा खुकुलो बनाउँदै लगिएसंगै नागरिकस्तरबाट बढेको लापरवाहीका कारण तनहुँमा पुनः संक्रमितको संख्या हृवात्तै बढेको स्वास्थ्य कार्यालय तनहुँले जनाएको छ ।
स्वास्थ्य कार्यालयको पछिल्लो तथ्याङ्क अनुसार तनहुँको व्यास नगरपालिका, म्याग्दे गाउँपालिका र शुक्लागण्डकी नगरपालिका क्षेत्रमा कोरोना संक्रमितको संख्या दैनिक बढ्दै गएको देखाइएको छ। दोश्रो लहरको कोरोना संक्रमण फैलिएसंगै संक्रमणबाट ९९ जनाको मृत्यु भइसकेको छ ।
