भानु नगरपालिकामा गत आवको वार्षिक समीक्षा
भानु : तनहुँको भानु नगरपालिकाले आर्थिक वर्ष २०८२/०८३ मा सञ्चालन गरेका नीति, योजना, कार्यक्रम तथा सेवा प्रवाहको वार्षिक समीक्षा गरेको छ । नगरप्रमुख आनन्दराज त्रिपाठीको अध्यक्षतामा आयोजित कार्यक्रममा गत आर्थिक वर्षमा नगरपालिकाका विभिन्न शाखा तथा वडामार्फत सञ्चालन गरिएका योजना तथा कार्यक्रमको प्रगति, उपलब्धि र कार्यान्वयन अवस्थाबारे समीक्षा गरिएको हो ।
समीक्षा कार्यक्रममा नगरपालिकाले आर्थिक वर्षभरि सञ्चालन गरेका विकास निर्माण, सेवा प्रवाह तथा विभिन्न कार्यक्रमको प्रगति र उपलब्धिबारे छलफल गरिएको थियो । योजनाहरू कार्यान्वयनका क्रममा देखिएका समस्या तथा चुनौती पहिचान गर्दै आगामी दिनमा सुधार गर्नुपर्ने विषयमा समेत सहभागीबीच छलफल भएको थियो ।
नगरपालिकाले नागरिकलाई प्रदान गर्दै आएको सेवा प्रवाहलाई थप प्रभावकारी, पारदर्शी र नागरिकमैत्री बनाउने तथा विकासका कार्यक्रमलाई परिणाममुखी ढंगले अघि बढाउने विषयमा कार्यक्रममा जोड दिइएको थियो। आगामी दिनमा योजना तथा कार्यक्रमको प्रभावकारी कार्यान्वयन, अनुगमन र मूल्याङ्कनलाई थप व्यवस्थित बनाउँदै नगरपालिकाको समग्र विकासलाई गति दिने विषयमा पनि छलफल भएको जनाइएको छ ।
कार्यक्रममा नगर उपप्रमुख, जनप्रतिनिधि, विषयगत शाखाका प्रमुख तथा कर्मचारीहरूको सहभागिता रहेको थियो। सहभागीहरूले गत वर्षका कार्यक्रमको समीक्षा गर्दै आगामी कार्यदिशा र प्राथमिकताबारे समेत धारणा राखेका थिए ।
