पृथ्वीराजमार्गको गाछेपानी-कोत्रे खण्डमा धुलो र हिलो

पृथ्वीराजमार्ग अन्तर्गत तनहुँको शुक्लागण्डकी स्थित गाछेपानी-कोत्रे सडक खण्डमा यात्रु तथा स्थानीयवासीहरुले अनेक समस्या झेल्नु परेको छ । हिउँद होस् या बर्खा संधै सास्ती हुने गरेको स्थानीय बताउँछन् । बर्खामा पानी जाने ठाउँ नभएर सडक नै खोला हुँदै पोखरी बन्छ । हिलो भएर यात्रा गर्न निकै कठिन र जोखिम हुन्छ । अहिले पानी पर्न कम हुँदै गएपछि धुलो उडेर हिडिनसक्नु छ । केही बर्ष यतादेखि बाह्रै महिना यो सडकको नियती यस्तै छ । यो अवस्था सुधारका लागि गम्भिर रुपमा कहिँकतैबाट पनि प्रयास भएको देखिदैन ।

धुलोले आजित भएका स्थानीयहरु शुक्रबार कोत्रे बजारमा जम्मा भई यातायात सेवा अवरुद्ध पारेका थिए । तत्कालै प्रहरीले बल प्रयोग गरी यातायात संचालन गराएको थियो । सो क्रममा स्थानीय महिला गोमा थापा आक्रोशित हुँदै सडक छिटो स्तरोन्नती हुनर्ुपर्ने आफुहरुको माग सुनुवाई नभए सडकमै सुत्ने चेतावनी दिइन् ।

धुलोले जनतालाई पारेको प्रभाव र दुःख सरकारले बुझ्नै नसकेको उनको गुनासो छ । उनले भनिन्, ‘नेताहरु सबै आफ्नै स्वार्थमा लिप्त भए । जनताको पीरमर्काबारे उनीहरुलाई कुनै मतलबै छैन । अबको चुनावमा कुन मुख लिएर भोट माग्न आउँछन् हेरौला । घरको भान्छा कोठा, सुत्ने ओछ्यान सबै धुलोले सेतै हुने र दिनमा कम्तिमा ८/१० पटक घर सफा गरिरहनु पर्ने स्थानीयको गुनासो छ ।

स्थानीय युवा संजोग घलेले यहाँका स्थानीयले दैनिक ३०० ग्राम धुलो खादै आएको बताए । ‘बाहिर गएपनि धुलो छ, घरभित्र बसेपनि धुलो नै छ’, उनले भने ‘हामीले दैनिक ३०० ग्राम धुलो खान्छौं जस्तो लाग्छ । दिनमा ३/४ वटा मास्क फेरेर लगाउनु पर्ने अवस्था छ । यो बाटोको लागि धेरै आवाज उठायौँ तर सम्बन्धित निकायले वास्तै गरेन ।’

दुलेगौँडादेखि कोत्रेसम्मको यात्रा गर्ने हो भने धुलोले मान्छे चिन्न सकिदैन । चक्काजामको नेतृत्व गरेका शुक्लागण्डकी नागरिक समाजका अध्यक्ष खेमराज खनालले लामो समयदेखि सडकको यो दुरावस्था हुँदा पनि सम्बन्धित निकाय मुकदर्शक मात्र बनेको आरोप लगाए । निदाएर बसेको निकायलाई झकझक्याउन साँकेतिक रुपमा सडक जाम गर्नुपरेको उनले बताए ।

यता सडक डिभिजन कार्यालय तनहुँकी प्रमुख लक्ष्मी केसीले अब बन्ने चार लेनको नयाँ परियोजनाको ठेक्का लिने चाइनिज कम्पनीलाई आफुहरुले हस्तान्तरण गरिसकेकाले केही गर्न नसक्ने बताइन् । उनले आफुहरुको हातमा केही नभएको उल्लेख गरिन् । उनले भनिन् ‘मैले त समन्वय गरी राखेको छु, धुवाधुलो छ, जनताको चर्को आवाज छ, यसलाई छिटो सम्बोधन गर्नु पर्‍यो भनेर प्रोजेक्टलाई चिठीपत्र पठाइरहेको छु । बाँकी अगाडी बढ्ने काम कम्पनीको हो ।’

मुग्लिङ-पोखरा सडक परियोजनाका पुर्वीय खण्डको परियोजना व्यवस्थापक प्रेम प्रकाश खत्रीले भर्खरै सम्भौता भएर तीन जना चाइनिजहरु आइपुगेको र निर्माण सामाग्री तथा मेशिन ल्याउन बाँकी रहेकाले काम शुरु नभएको बताए । उनले कामदार ल्याउनका लागि भिषा प्रक्रिया भइरहेकाले काम शुरु हुन अझै दुइ तीन महिना लाग्न सक्ने जानकारी दिए ।

खाल्डाखुल्टी परेको सडकलाई भने छिट्टै मर्मत गर्ने प्रयासमा रहेको बताउँदै उनले भने अहिले तीन जना मात्र कामदार भएकाले गाह्रो भएको छ । साह्रै अप्ठ्यारो ठाउँमा सडक डिभिजन कार्यालयसंगै समन्वय गरेर तत्काललाई राहत पुग्नेे मर्मत कार्य अगाडी बढाउने योजनामा रहेको उनले सुनाए ।

सेयर गर्नुहोस्

प्रतिक्रिया दिनुहोस्

सम्बन्धित खवर