बन्दिपुरको सपना : अपुरो रहे पर्यटकीय पूर्वाधार
भञ्ज्याङ समाचारदाता/बन्दिपुर
पहाडकी उपनामले परिचित पर्यटकीय नगरी बन्दिपुरको महत्व विशेष छ । यहाँको विशेषतालाई थप उजिल्याउन गाउँपालिका र स्थानीय बासिन्दा लागि परेका छन् ।
पर्यटकीय महत्व बोकेको सुन्दर गाउँपालिका बन्दिपुरलाई संसारभर चिनाउने सपना बोकेका अध्यक्ष पूर्ण सिंह थापाको कार्यकाल सकिनै लागेको छ ।
पर्यटकीय रुपमा नै विकास गर्ने लक्ष्यसहित २० वर्षे गुरुयोजना तयार पारेर अघि बढेको बन्दिपुर विकासको गतिमा अघि बढिरहेको छ ।
पर्यटन प्रवर्द्धनका लागि गाउँपालिकाले पर्यटन लक्षित पूर्वाधारहरु मिनी ग्रेटवाल, केबलकार, साइकल लेन, रक क्लाइमिङ, जीपलाइनदेखि शीशाको भ्यूसमेत बनाउने योजना बनाएको छ ।
गाउँपालिका अध्यक्ष थापाले पर्यटनलाई मात्र होइन, पालिकामा शिक्षा, स्वास्थ्य, कृषि र पूर्वाधारको क्षेत्रका कामलाई पनि प्राथमिकतामा राखेका छन् ।
कार्यकाल सकिन केही समय मात्रै बाँकी हुँदा पनि थापाले आफुले अगाडि बढाएका दीर्घकालिन महत्वका आयोजना तथा कार्यक्रमलाई पूर्णता दिने प्रयासमा खट्टएिका छन् ।
गाउँपालिकाले बन्दिपुरमा पर्यटन प्रवर्द्धनकै लागि चार किलोमिटर लामो मिनी ग्रेटवाल निर्माण कार्य अघि बढाएको छ । चार किलोमिटरको बन्दिपुर मिनी ग्रेटवाल निर्माणको योजना मध्ये अहिलेसम्म १४ सय मिटरको काम सम्पन्न भइसकेको छ ।
गाउँपालिका अध्यक्ष थापाका अनुसार १९ करोड लागतमा निर्माण गर्न लागिएको मिनी ग्रेटवालको १ करोड रुपैयाँको काम भइसकेको छ। हालै ५ करोडको टेण्डर परेको उनले बताए ।
बन्दिपुर मिनी ग्रेटवाल नाम दिइएको मणिमुकुन्देश्वरी पर्खाल निर्माणको काम जारी राखिएको छ । यो आधुनिक पदमार्ग बन्दिपुर बजारबाट सुरु भई थानीमाई, समिभञ्ज्याङ् हुँदै मुकुन्देश्वरी गढी जोड्ने योजना छ ।
सय गन्तब्य मध्ये एक कार्यक्रम तथा गाउँपालिकाबाट निकासा भएको गरी अहिलेसम्म एक करोड रुपैयाँको काम भइसकेको गाउँपालिका अध्यक्ष थापाले बताए ।
‘थानीमाई मुकुन्देश्वरी पर्यटकीय पदमार्ग’ नामाकरण गरी थालिएको पदमार्गको चौर्डाई चार मिटर र पर्खालको उचाई २ फिट रहने अध्यक्ष थापाले बताए ।
गण्डकी प्रदेशस्थित तनहुँ जिल्लामा अवस्थित पर्यटकीय महत्व बोकेको बन्दिपुर गाउँपालिका १०२ बर्ग कि.मि. क्षेत्रफलमा फैलिएको सानो तर विविधताले सजिएको सुन्दर गाउँपालिका हो ।
आ.व. २०७०/७१ (२०७१ बैशाख २५ गते) मा साविक धरमपानी र बन्दिपुर गाउँ विकास समितिहरुलाई समेटेर बन्दिपुर नगरपालिका घोषणा गरिएको थियो। गाउँपालिकाले बन्दिपुर ग्रेटवाल जस्तै अन्य थुप्रै महत्वाकांक्षी योजनाहरु अघि सारेको छ ।
यस्तै, गाउँपालिकाले कृषि क्षेत्रमा पनि पालिकाले महत्पूर्ण कामहरु गरेको गाउँपालिका अध्यक्ष थापाले बताए । चक्लाबन्दी कार्यक्रमदेखि कृषि क्षेत्रलाई आधुनिकीकरणमा ढाल्ने काम पनि पछिल्लो दुइ वर्षमा भएका छन् ।
गाउँपालिकामा फलफूल जोन, बाख्रा पकेट क्षेत्र, दूध पकेट क्षेत्र हुँदै तरकारी पकेट क्षेत्र विस्तार भएको छ । बन्दीपुर अहिले तरकारमा आत्मनिर्भर भइसकेको थापाले दाबी गरे ।
कृषि क्षेत्रमा युवा आकर्षण बढाउन युवाहरुलाई कृषि तालिमहरु प्रदान गरिएका छन् । गएको आर्थिक वर्षदेखि पालिकाले दुग्ध किसानहरुलाई प्रोत्साहित गर्न भन्दै दूधमा प्रतिलिटर एक रुपैयाँ अनुदानसमेत दिइएको थापाले बताए ।
मोटर यातायातको सुविधा नहुँदा पश्चिम पहाडको तनहुँ, कास्की, लमजुङ, गोरखा र मनाङका लागि दक्षिणबाट सामान ल्याउने मुख्य नाकाको रुपमा बन्दिपुर रहेको थियो ।
बन्दिपुर तनहुँ जिल्लाको पुरानो सदरमुकाम हो र वि.सं. २०२५ सालमा सदरमुकाम दमौली सारिए पनि बन्दिपुरले भने पछाडी फर्किनु परेको छैन ।
मुख्यतः पर्यटकीय रुपमा बन्दिपुरलाई विश्वसामु चिनाउने सपना देखेका अध्यक्ष थापाको कार्यकाल सकिएपछि नयाँ आउने जनप्रतिनिधिहरुले २० वर्षे गुरुयोजनालाई कसरी अघि बढाउने हुन्, त्यो भने हेर्न बाँकी नै छ ।
अहिले स्थानीय तहको निर्वाचन संघारमै आइसकेको छ । गाउँपालिकाको अध्यक्ष र उपाध्यक्षको नेतृत्व दाबी गर्दै विभिन्न दलका दर्जन नेताहरु मैदानमा उत्रिएका छन् ।
