म्याग्दे गाउँपालिकाका अध्यक्षको पहिलो निर्णय : घर नम्बर प्लेट निःशुल्क प्रदान गर्ने
भञ्ज्याङ न्यूज
तनहुँको म्याग्दे गाउँपालिकाका नवनिर्वाचित जनप्रतिनिधिहरुले शपथग्रहणसंगै पदभार ग्रहण गरेका छन् । गाउँपालिकाका अध्यक्ष श्रीप्रसाद श्रेष्ठ र उपाध्यक्ष बालकृष्ण घिमिरेले शुक्रबार पदभार ग्रहण गरेका हुन् ।
पदभार ग्रहण गर्दै अध्यक्ष श्रेष्ठले घर नक्सा कायम भएका घरमा निःशुल्क नम्बर प्लेट वितरण गर्ने निर्णय गरेका छन् । एकपटकका लागि घर नक्सा पास भएका घरहरुमा नम्बर प्लेट निःशुल्क वितरण गर्ने निर्णय भएको प्रमुख प्रशासकीय अधिकृत नारायणप्रसाद अधिकारीले बताए ।
यस्तै उपाध्यक्ष घिमिरेले प्रत्येक वडामा मेलमिलाप केन्द्र गठन गर्ने निर्णय गरेका छन् ।
गाउँपालिकाको कुल १८ हजार १०५ मतदाता रहेकामा ११ हजार ९४३ मत खसेको थियो । म्याग्देमा नेकपा एमालेले तीन वडा र कांग्रेसले चार वटा वडामा वडाध्यक्ष जितेका छन् ।
वडा नम्बर १ मा एमालेका मणिभद्र वाग्ले (६९९), वडा नम्बर २ मा कांग्रेसका शिवबहादुर क्षेत्री (८८९), वडा नम्बर ३ मा एमालेका टुकराज अधिकारी (६६१), वडा नम्बर ४ मा कांग्रेसका दीपककुमार श्रेष्ठ (१०३८), वडा नम्बर ५ मा कांग्रेसका शिवबहादुर आले (५७८), वडा नम्बर ६ मा कांग्रेसका हिरालाल गुरुङ (७४२) र वडा नम्बर ७ मा एमालेका उम्मेद्वार वसन्त कुमार श्रेष्ठ (७२२) वडाध्यक्षमा निर्वाचित भएका छन् ।
