नवौं राष्ट्रिय खेलकुद प्रतियोगिता : बागमतीलाई हराउँदै त्रिभुवन आर्मीले जित्यो महिला बास्केटबलको उपाधी
भञ्ज्याङ न्यूज
तनहुँ । नवौं राष्ट्रिय खेलकुद प्रतियोगिता अन्तर्गत तनहुँको दमौलीमा भएको महिला बास्केटबल प्रतियोगिताको उपाधी त्रिभुवन आर्मी क्लबले जितेको छ । बुधबार भएको फाइनल प्रतिस्पर्धामा आर्मीले बागमती प्रदेशलाई ४५-३० अंकले पराजित गरी उपाधी आफ्नो कब्जामा पार्न सफल भएको हो ।
प्रतियोगितामा आर्मीले पहिलो क्वाटरमा १०-८, दोस्रो क्वाटरमा १४-७, तेस्रो क्वाटरमा ८-१२ र चौथो क्वाटरमा १३-३ अंक प्राप्त गरेको थियो ।
प्रथम हुने त्रिभुवन आर्मीको जीतमा प्रतिक्षा मगरले व्यक्तिगत सबैभन्दा बढी ११ अंक जोडेकी थिइन् । त्यस्तै दोस्रो भएको बागमति प्रदेशबाट अतिशा मल्ल ठकुरीले सबैभन्दा बढी ८ अंक जोडेकी थिइन् ।
यस्तै, सुदुरपश्चिम प्रदेशलाई पराजित गर्दै गण्डकी प्रदेश तेस्रो भएको छ । गण्डकी प्रदेशले सुदुरपश्चिम प्रदेशलाई ४६-२४ अंकले पराजित गरेको छ ।
गण्डकीले पहिलो क्वाटरमा १६-९, दोस्रो क्वाटरमा १०-४, तेस्रो क्वाटरमा १२-७ र चौथो क्वाटरमा ८-४ अंक प्राप्त गरेको थियो । गण्डकी प्रदेशबाट सिमा गरवुजाले सबैभन्दा बढि १९ अंक जोडेकी थिइन् ।
यस्तै, थ्री बाइ थ्री महिला बास्केटबल प्रतियोगिताको उपाधी सशस्त्र प्रहरीले हातपारेको छ । सशस्त्र प्रहरीले आर्मीलाई ८-५ अंकले पराजित गर्दै प्रथम भएको हो । सशस्त्र प्रहरीबाट आकृति श्रेष्ठले सबैभन्दा बढि ३ अंक जोडेकी थिइन् ।
यसैगरी गण्डकी प्रदेशले बागमति प्रदेशलाई ११-७ अंकले पराजित गर्दै तेस्रो स्थान हात परेको छ । फुलकोट र थ्री बाई थ्री दुवै प्रतियोगितामा गण्डकी प्रदेश तेस्रो भएको छ ।
